ضلع کیچ ئنا تحصیل بلیدہ ٹی الس آبادی تیٹ پاکستانی لشکر نا چیک پوسٹ آتا برخلاف برانز بناء کرے۔
بلیدہ نا ہند گلی، زُندان، ئٹی آبادی نا تہٹی پاکستانی لشکر نا چیک پوسٹ خلنگ نا برخلاف گلی بلیدہ نا جہی آ بندغ آک برانز کرسا کسر ئے بند کریر۔
برانز ئٹ چُنا نیاڑی تتون اوار مخلوق نا بھلو کچ ئس اوار مس و آبادی تیان چیک پوسٹ آتے مُر کننگ نا خواست کریر۔
برانزیک پاریر کہ باہوٹ بازار ئٹی مُست اسہ چک پوسٹ ئس اس ہراڑان مخلوق بیزار اس داسا نن زُندان ئٹی آبادی نا تہٹی پوسکنو چک پوسٹ خلنگ الوفن انتیے کہ دا چیک پوسٹ آتیا لس مخلوق ئے تنگ کننگک۔
خیال ئٹ مرے پن کروک علاقہ و ہیب کھیب ئنا آبادی تیٹ داکان مُست ہم پاکستانی لشکر بھلو کچ ئسیٹی ساڑی ءِ و آبادی تیٹ سرچ لائٹ خلنگ نا سوب آن نیاڑی تِہ بھاز فریشانی مننگ ءِ۔
مخلوق نا پاننگ ءِ کہ پاکستانی لشکر نا بے بندغی روشت نا سوب آن بندغ آک فریشان ءُ و اوفتا فریشانی تیٹ ودکی مننگ ءِ، پاکستانی لشکر اُرا تا خُڑک آن مُر مرے۔
