بندغی حق آتیکن کاریم کروک پیٹر ٹیچل، جنیوا ٹی اقوام متحدہ نا دفتر نا پیشن آ “بروکن چیئر” نا ہَند آ بی این ایم نا برانز ئٹی تران کرسہ بلوچ راج ئتو پاکستانی زوراکی تیا پاکستان آ جہانی رکھ ئنا خواست کرے۔ دہ سال مہالو آن بلوچ آجوئی نا جہد ئتو سلوکا ٹیچل، 1948ء ئٹی کوزہ گیر پاکستان نا بلوچستان آ کوزہ آ افسوس کرے و زوراکی نا بیگواہی، زوراکی، دروغ ئنا مونتس تیٹ خلّنگ بِٹنگ و بندغی حق آتا لتاڑ تیا ہیت کرے۔
ٹیچل دے کیہلوک حکومت آتیا زور شاغا کہ او پاکستان ئے تروکا فوجی کمک ئے تورِر انتئے کہ دا کمک ئے پاکستان بلوچ اُلس ئنا برخلاف کاریم ئٹی ہتنگ ئٹی ءِ۔ ٹیچل اونا منشور و بندغی حق آتا قانود آتہ پرغنگ آ دولت مشترکہ ٹی پاکستان نا اوٹی بشخ مننگ ئے ہم توننگ نا خواست کرے۔
ٹیچل بلوچ راجی آجوئی نا جہد ئنا مخ تفی کن جہانی تیبر نا کاریم کننگ آ زور شاغا و پارے کہ پاکستان نا سیاسی و فوجی سروک آتیان جنگی ڈوہداری و بندغی نا برخلاف زوراکی کننگ آ حساب ہلّنگ مرے۔
بلوچ راجی زْرمبشت (بی این ایم) نا کُنڈ آن مروکا برانز ٹی بندغی حق آتا کاریم کروک رحیمہ محموت ظلم و تادی تا برخلاف بلوچ راج ئنا جہد ئتو سلِنگ نا پڑو کرے۔ دا برانز ‘اقوام متحدہ’ نا بندغی حق آتا کونسل (ایچ آر سی) نا پنجا ءُ ہفتمیکو دیوان نا وخت آ بلوچ راج ئنا ساڑی آ خْوارنگا حالت نا بارت ئٹ سرپندی تنّنگ کن کننگا۔
محموت پھاش پارے کہ، "ای داڑے بلوچستان نا مخلوق تون تینا اواری نا درشانی کن اویغور آتا نمائندئی کننگ ئٹی اُٹ۔”
او چینی کمیونسٹ پارٹی نا اویغور آتیا و پاکستانی فوج ئنا بلوچ راج آ زوراکی تیٹ خُڑکی آ تران کرسہ چین و پاکستان نا تعلقداری تہ پھاش کرے۔ او دا ہیت آ زور تخا کہ سی پیک آن بارنگا ڈٹ آک بلوچ ئے پین پدبِٹنگ کن پاکستان ئے کمک تیرہ۔
"چین فوجی و زرّ ئنا کمک تون اوار سی پیک نا وڑئنا ڈٹ آتیٹ پاکستان تون اوار سلوک ءِ۔ دا شریکی پاکستان نا زوراکی تہ زْیات کننگ ئٹی ءِ۔”
ُگُڈی ٹی او محکوم آ راج آتا نْیام ئٹ اواری و اوفتا اوارنگا دشمن آتا برخلاف اواری ئٹ جہد کننگ نا پارت کرے۔
او ایغور و بلوچ راج ہڑتوما تیکن انصاف نا اومیت ئے درشان کرسہ پارے کہ، "نن پاکستان و چین ئنا زوراکی تا برخلاف سَلوک اُن۔”
