استاد واحد کمبر ئے علاج نا وختا ڈنی ڈیہہ آن زوراکی ئٹ بیگواہ کننگانے۔ خاہوت نا پریس کانفرنس

بلوچ کماش سیاسی راہشون واحد کمبر نا مسڑ مہلب بلوچ ایلو بندغ آتون اوار شال پریس کلب ئٹی پریس کانفرنس کرسا پارینے کہ کنا باوہ واحد کمبر، ہرادے بلوچ تحریک ئٹ اونا جہد و بلوچ قومی سیاست ئٹی اونا کڑدار نا سوب آن استاد واحد کمبر نا پن ئٹ چاننگک۔

او پارے کہ 1970 آن اسہ سیاسی لیڈر و راہشون ئسے نا حیثیت ئٹ او بلوچ قوم ئنا حق کن توار بڑز کرسا کرینے۔ بلوچستان نا سیاست و بلوچستان نا سیاسی سروک آتا اسلام آباد نا حکمران تتون تعلقداری تیٹ کیہی شیفی بُڑذی بسنے، ولے کنا باوہ تینا قوم تون وفاداری، مہر و اوفتا جائز مفاد آتا رکھ کن عزم و استحکام ئٹی ہچو کمبوتی متنے۔ بھازی آن اندا سوب ءِ کہ او ساندہ پاکستانی حکمران تیکن اسہ وے دوستو سیاست دان ئس مسنے۔

او پارے کہ ریاستی ادارہ آتیان اودے ساندہ خطرہ مسنے، 14 مارچ 2007 آ پاکستان نا ڈھکوک اداراہ آتا کارندہ غاک پولیس نا کمک ئٹ اودے اونا سنگت آتتون اوار بیدس عدالت و قانود دزگیر کننگ آن گڈ 41 تُو بیگواہ کریر۔ داخس وخت اودے ٹارچر سیل تیٹ تخنگ آن پد ملٹری انٹلی جنس نا کوالخواک اودے 12 دہشت گردی نا کیس خلِسہ پولیس نا کاؤنٹر ٹیرر ازم ڈیپارٹمنٹ ( سی ٹی ڈی ) نا حوالہ کریر، و دا وڑ اودے بھاش کننگا و پاکستانی عدالت آتیٹ اونا باقاعدہ مقدمہ بناء کننگا۔

کنا باوہ ئے 2011 ٹی سپریم کورٹ دروغ و بے کاٹم آ کیس آتیان شرفداری ئٹ بری کرے۔ اوکان پد ہم ریاستی ادارہ غاک اونا سیاسی نظریہ غاتا سوب آن اودے تنگ کریرہ۔ پاکستانی لشکر ننا اُرا غا چھاپہ خلک و خاخری آسِلاح تیٹ جلہو کرے۔ اندا سوب آن کنا کماش آ باوہ ئے روپوش مروئی تما و او بھلو وخت ئس روپوشی ٹی گدریفے۔

پریس کانفرنس ئٹی پاننگا کہ دا زوت ئٹ اونا جانجوڑی ہم بھاز زیمی مسس، اودے کیہی وڑ ئنا ناجوڑیک پلویڑ کریسر۔ اُست ئنا ناجوڑی نا سوب آن سیال آتا کمک ئٹ اود دے کیہلوک بلوچستان آ ہنا ہراکان علاج کن ایران نا شار کرمان آ راہی کننگا۔ علاج ئٹ وخت لگنگ نا سوب آن اونا ہموڑے رہینگ نا بندوبست کننگا تاکہ اودے تینا ڈاکٹر تیا ہِننگ آ اڑزانی مرے۔

او پارے کہ 19 جولائی 2024 آ کنا باوہ ’ واحد کمبر‘ سودا ہلنگ کن اُراغان پیشتما، او تینا اُراغان خڑک ئنا دکان آن سودا ہلنگ اس کہ چھار بندغ گاڑی ٹی سوار ( ہرافتتون پژو فارس پنیئو پیہنو رنگ ئنا ایرانی گاڑیس اس) بسر و اودے زور ئٹ گاڑی ٹی شاغنگ نا کوشست کریر، اونا مزاحمت آ خڑک ئنا دکاندارک مداخلت کریر ولے اوفتے ہم دڑکو ترسا مُر کننگا و کنا باوہ ئے بیگواہ کرسا دریر۔ او اوڑے اسہ بدر ءُ بندغ ئس اس اندا سوب آن ہندی بندغ آک و خن ئٹ خنوکا شاہد آک ہم دا حالیت ئے سرپند مننگ کتور ولے او دمدستی ہنار اونا اُراغا حوال تسر۔

اونا پاننگ اس کہ اوڑے کنا باوہ نا خیرخواہک جتا وڑ ئٹ اودے پٹنگ نا کوشست کریر ولے اونا ہچو ڈس رسینگتو۔ داسا دا ہیت ئٹ ہچو شک ئنا گنجائشت بچتنے کہ اودے پاکستان نا ڈھکوک ادارہ غاک تینا ایجنٹ آتا کمک ئٹ پٹنگ آن پد بیگوہ کرسا پاکستان آ ہیسنو و داڑے او اوفتا ڈھکوک بندی جاہ تیٹ ءِ۔ خن ئٹ خنوک شاہدی تا بیانات، تدینی نا ثبوت و استاد واحد کمبر نا شخصیت آن پاش مریک کہ اودے ریاست پاکستان نا ادارہ غاک بیگواہ کرینو۔

او پارے کہ کنا باوہ اسہ کماشو بندغ اسے، ہرا عملی وڑ ئٹ اسہ نیم ریٹائر زند ئس گدریفنگ اس۔ یقینیکا اونا بلوچ قومی سیاست ئٹی اسہ بھلو و راہشونیئو کڑدار اسے، داڑان نمن کننگ مفک ولے راستکی اندادے کہ اونا جانجوڑی اودے عملی جہد آن مُر کریسس۔ زوراکی نا بیگواہ بندغی نا برخلاف اسہ اندنو ڈوہ اسے ہرادے ہچ وڑ آ جائز پاننگ مفک ولے اسہ کماش ئسے ہرا نا علاج مننگ اس اودے بیگواہ کننگ زوراکی نا بیگواہی تا شدت ئے ودفِسہ پین زیات خوابو دروشم ئس ایتک۔ دا وڑ دا ڈیہہ ئنا سالمیت نا معاملہ بچپک بلکہ اسہ تینا مون بیر ہلنگ نا دروشم ہلیک، اشتماعی سزا نا دروشم ہلیک۔ ہرا بلوچستان نا ہر اُرا ئے اوندھائی ٹی بٹینے۔

او پارے کہ کنا باوہ، ہرا نا روپوشی نا سوب آن نن تدوکا 17 سال آن اوڑان مُری ئے سگنگ اسن، است ئنا ناجوڑی نا گواچی ءِ۔ اندا زوت ئٹ اونا انجیو پلاسٹی مسس و اودے دے ئٹی کیہی وار دارو بکار مسکہ۔ ڈاکٹر آک سخت پنت کرینو کہ اونا منَہ دارو ہرافتے ہرؤخت کنوئی ءِ داڑے اسکان ہم پنت کرینے کہ بیرہ خاص کمپنی نا دارو کُنے تاکہ دارو تا معیار ئٹ فرخ بف و اونا جانجوڑی زیمی مف۔ اگہ اودے وخت آ دارو رسینگپ تو اونا زند ئے خطرہ مرو۔

اوفتیان سوج کننگا کہ اودے انتئے بیگواہ کننگانے؟ دا نا ورندی ٹی او پاریر کہ دا سوج ئنا ورندئ ئے بیگواہ کروکا جوان تننگ کیرہ ولے ننا اندازہ و خلیس پائک کہ پاکستانی کوالخواک بلوچ قومی تحریک آ دباؤ شاغنگ کن اودے کاریم ئٹ ہتنگ خواہرہ۔ ہنوکاتم ئٹ ہم دزگیری ٹی اوڑا بیدادی کننگاسس و پریس کانفرنس کن دباؤ شاغنگاسس تاکہ او تینا وے کروکا ڈوہ تِہ منّے ولے او منتوسس داسا ہم بھازی آن اودے بیدادی و نفسیاتی دباؤ نا ذریعت ئٹ اودے بیوس کننگ و اسہ دروغو بیانیہ ئس مونا ہتنگ خواہرہ، داخس وخت ئٹی او پاکستان نا قید ئٹی ءِ بھازی آن ہڑدے اوڑا بیدادی کننگک، اودے آزار کننگک۔

او پارے کہ نن نُما ذریعت ئٹ دا ہیت ئے رکارڈ آ ہتنگ خواہنہ کہ بھازی آن اودے نزور کننگ کن اونا خاہوت ئے ہم نسخان تننگ نا کوشست کننگ مرو یا اودے نفسیاتی سِلاہ نا وڑ کاریم ئٹ ہتسہ اودے تینا سیاسی نظریہ غا تیان دو کشنگ کن یا مخالفانہ بیانیہ تننگ آ بیوس کنگو۔ ہرا کہ اسل قابل قبول مروف۔

او ودیک پارے کہ کنا باوہ واحد کمبر ئے اگہ گڑاس مس تو دانا ذمہ وار ریاست پاکستان و اونا عسکری ادارہ غاک مرور۔ نن پاش پانہ کہ اونا خاہوت اونا زوراکی نا بیگواہی آ اسل چُپ مروف، نن ہمو کُل ذرائع تِہ کاریم ئٹ ہتون ہراڑان اونا آجوئی نا اومیت مرے۔

بندغی حق آتا کُل ادارہ و بلوچ راج آن خواست کینہ کہ او دا جہد ئٹ ننتو اوار مریر۔

او پارے کہ دا پریس کانفرنس نا مسخت کوالخواہ تِہ کلہو تننگ اس کہ او تینا ذمہ واری تِہ پُہہ مریر و استاد واحد کمبر نا آجوئی ئے منکن کیر، اودے دروغ ئنا کیس تیان پاکستان نا سپریم کورٹ باعزت بری کرینے۔ اوڑا ننا چائند نا رد ئٹ ہچو دوبہ اف کہ ہرا نا بنداو آ اودے بندی تخنگ مرے چہ جائے کہ اودے علاج نا وختا ڈنی ڈیہہ آن بیگواہ کننگانے۔