حوال تا رد ئٹ بلوچستان نا علاقہ مشکے ٹی پاکستانی لشکر جتا ہند آتیا لشکر کشی کننگ ءِ۔ ایلو کنڈ آن قلات ئٹ سلاہ بند بندغ آتا جلہو نا حوال ہم ارے۔
شابیتی حوال تا رد ئٹ مشکے نا جتا علاقہ آتیٹ پاکستانی لشکر نا کارندہ غاک کیہی گاڑی، موٹر سائیکل و پندھ آ گشت کننگ ءُ۔
پاکستانی لشکر تون جہی آ ڈیتھ اسکواڈ ہم کمک کننگ ءِ۔ مشکے نا علاقہ بُزی، کلکلونک، مرماسی، کلید و پچڑ ئٹی لشکر کشی مننگ ءِ۔
واہم دا بارث ئٹ دائسکان ودیک حوال دو بتنے و کوالخواہ تا کنڈ آن ہم ہچو ہیت متنے۔
خیال ئٹ مرے دا وختا بلوچستان نا جتا علاقہ غاک لشکر کشی نا پلویڑ ئٹی ءُ، داکان مُست آواران، مستونگ، قلات، و بولان نا ہیب کھیب ئٹ ہم دنو حوال بسنے ولے حکومتی کوالخواک تا لشکر کشی تا بارث ئٹ ہچ ہیت کننگ افس۔
ایلو کنڈ آن قلات آن حوال رسینگانے کہ درست مفروکو سلاہ بند بندغ اسہ موبائل ٹاور ئسے جلہو ئٹ بھس کرینو۔
حوال تا رد ئٹ درو ننکان درست مفروکو سلاہ بند بندغ قلات نا علاقہ ہربوئی مرجان ئٹی ٹیلی نار موبائل ٹاور نا کُل مشینری تِہ سمکاری کرسا ہُشانو۔
موبائل ٹاور تِہ ہُشنگ نا گیشتر ذمہ واری تِہ بلوچ آجوئی خواہوک سلاہ بند تنظیم آک ہرفِرہ واہم دا نا ذمہ واری ئے دائسکان کس ئس ہرفتنے۔
