زوراکی نا بیگواہی تا برخلاف برجاء برانزی کیمپ ئے 5579 دے مس، خاران آن بروکا سیاسی و چاگڑدی کاریم کروک اللہ بخش، نذیر احمد، داد محمد بلوچ و ایلوفک اواری نا درشانی کریر۔
وی بی ایم پی نا وائس چیئرمین ماما قدیر بلوچ پارے کہ بلوچ راج تینا بقاء و بروکا آسودہ غا وخت کن کوزہ گیر ریاست نا برخلاف جہد ئٹی ءِ۔ بلوچ ورنا غا سیاسی جہد کارک تینا دلیری و سرسوب آ جہد ئٹ کوزہ گیر ریاست پاکستان ئے خن شیف کرینو، اونا معیشت برباد مسّنے و تینا بچّفنگ کن او نہ بیرہ فوجی زوراکی ئٹ جیٹ و ہیلی تیٹ بلوچ مخلوق آ جلہو کننگ ئٹی ءِ بلکہ ہر جاگہ غا تینا جہی آ دلّار آتا دُو آن ہزار آ بلوچ ورنا تِہ بیگواہ و شہید کرفینے۔
او پارے کہ ہمو دلیر تا وہوکا دتر نا سوَب آن اینو مُچا جہان ٹی بلوچستان نا توار سرمسّنے۔ اینو نہ بیرہ جہانی میڈیا بلکہ امریکی ایوان آتسکان بلوچستان نا توار ہنوکے۔
ماما قدیر بلوچ پارے کہ دہنو وخت ئسیٹ ہراتم غُٹ جہان پاکستان نا زوراکی تیان بیزار مسّنے، کوزہ گیر پاکستانی ریاست مچا جہان ٹی بلوچستان نا بقا، بلوچ نا جہد ئنا مُخ تفی و بلوچ ورنا تا جنگ ئنا پِڑ آ دلیری ئے خنسہ آمخ مسّنے۔ داسا او پِن ئنا گچین کاری ئس کرسہ دنیا ئے دا نشان ترو کہ بلوچ تینا حق نہ بلکہ پاکستان نا تہٹی رہینگسہ آسراتی خواہیک۔
او ودیک پارے کہ ہندا خاطر آن غُٹ غیرتی آ بلوچ آتیان خواست ءِ کہ او تینا شہید مروکا ایلم تیک ہرافک ننا آسودہ غا پھگہ کن دتر تسّر، اوفتا وہوکا دتر و قربانی تہ شرف ترسہ اسٹ مریر۔ گِڑاس آسراتی و گِڑاس مراد نا پوروی نا جہا تینا راجی غیرت آ سلِنگ بیرہ غیرتی آ راج آتا نشانی ءِ۔
