پنی آ بلوچ شائر، نوشتکار مبارک قاضی نا اولیکو سال پوروی نا وختا ڈگری کالج خاران و انٹر کالج مسکان قلات ئٹ جتاء مجلس اڈ کننگا۔
شابیتی حوال تا رد ئٹ گورنمنٹ بوائز ڈگری کالج خاران نا خوانندہ کونسل نا کُنڈان و گورنمنٹ انٹر کالج مسکان قلات ئٹ ہم خوانندہ تا کُنڈان خواجہ مبارک قاضی نا اولیکو برسی شرف و احترام ئٹ گدریفنگا ہراٹی خوانندہ آک مبارک قاضی نا زند و شاعری نا بابت ئٹ پاریر۔
ڈگری کالج خاران ئٹ اڈ مروکا مراگش ہراٹی شائر ءَ بولی دوست آ تون اوار خوانندہ آک بھلو کچ ئسیٹ اوار مسُر۔
مجلس نا اولیکو بشخ ٹی اولی سال ئنا خوانندہ شہزاد سلیم مبارک قاضی نا زند و شائری آتینا مقالہ پیش کرسا پارے کہ مبارک قاضی ساڑی آ وخت ئنا عظیم شاعر ئس اسک، ہرانا شعر آک بلوچستان نا مَش صحرا، دشت و بیابان و سمندر تا زکر مسکہ، اگرچہ اینو او جسمانی حوالہ ئٹ ننتون اوار ساڑی اف ولے اونا فن و شاعری ننا اُست ئٹ مرور۔
او پارے کہ قاضی مبارک دا عہد ئنا بلوچی بولی نا عظیم ءُ شائر ئس اسک ہرانا شائری بلوچستان و بلوچ راج اکن اسک، اَسہ لس بندغ ئسے کن شائری ئے پُہہ مننگ ئٹی ہچ مشکل الو۔
ایلو تراک کروکا ہم اونا شائری آ روشنی شاغار و پاریر کہ او تینا شائری نا زریعہ ئٹ ننا اُست ئٹ زندہ ءِ ۔
مجلس نا ایلو بشخ ئٹ مشائرہ مس، ہراٹی خاران نا پِنی آ شاعر ریاض زرمبش، جلال فراق، ضیاء شفیع، ممتاز ارمان، زائد راہی،عتیق ارشاد تون اوار خوانندہ آک ہم شئیر پاریر۔
مجلس نا ایسری ٹی اسٹوڈنٹ کونسل نا چیئرمین عزیز اکرم و حبیب عارف کُل خوانندہ تیتون اوار مہمان و شائر تا تھورو ئے ہرفیر۔
