آواران ئٹی پاکستانی لشکر بندغ آتے کیمپ آ بٹینگِفسہ تنگ کننگ ءِ و لشکری کارندہ غاک بھلو کچ ئسیٹی مش تا پاسوئی ہننگ آ خننگ مسنو۔
حوال تروکا تا رد ئٹ پاکستانی لشکر آواران نا جتا ہند آتا بندغ آتے تینا کیمپ آ بٹنگِفسہ تنگ کننگ ءِ۔ اینو بھلو کچ ئسیٹی پاکستانی لشکر موٹرسائیکل آتا پنیامو نا مش تا پاسوئی ہننگ آ خننگ مسنو۔ لشکری کارندہ آتون ہندی ڈیتھ اسکواڈ نا کارندہ غاک ہم تُد مسنو۔
حوال تروکا تا رد ئٹ آواران نا بھاز ہند آتا پاکستانی لشکر نا جاسوس جہاز و ڈرون آک چرینگ ءُ۔ دا رد ئٹ ننا گیشتر پٹ و پول برجاء ءِ۔
درو ہم پاکستانی لشکر آواران نا ہند چیدگی، پنیامو ٹی لشکر کشی کرینے و بندغ آتون زوراکی کرینو۔ پاکستانی لشکر ئے زالبول ہم تُد مسنے و زالبول آتون زوراکی کرینو۔
یاتی مرے کہ بلوچستان ئٹی ہراڑے پاکستانی لشکر آ بھلو جلہو ئس کننگک جلہو آن پد لشکر لس بندغ آتے زوراکی نا گواچی کیک۔
ہندا وڑ چھانڑدہ ستمبر آ ویگہ نا بی ایل ایف نا سرمچار آک آوارن نا بازار ئٹی پاکستانی لشکر نا بھلا کیمپ آ جلہو کریسُر و پانزدہ ستمبر آ مشکے ٹی کسر تفوک آتا رکھیفنگ کن سلوک اسُر اوفتے جلہو ئٹی ٹک کریسُر۔
بی ایل ایف نا جارکش میجر گہرام نا پاننگ اسک کہ جلہو ئٹی پنچ کارندہ خلنگانے و چھار ٹپی مسنے، جلہو نا وخت فوجی بریگیڈئیر و ایلو کمامدارک ساڑی مسنو۔
ہمو جلہو آن پد پاکستانی لشکر بندغ آتے زوراکی نا گواچی کننگ ءِ۔
