شہید اعجاز نا خاہوت نا کنڈان اونا شہیدی نا اولیکو سال پوروی آ اونا باوہ پیرئی ہند قلات ئٹی سِخت و شرف ئٹ مجلس اڈ تننگا۔ دا وختا علاقہ نا بندغ آک، بلوچ خوانوک آک و سول سوسائٹی نا باسک آک بھلو کچ ئسیٹی اوار مسُر۔ شہید اعجاز نا شہیدی نا اولیکو سال پوروی آ اوڑکن قرآن خوانی ہم کننگا و خیرات ہم کننگا۔
مجلس ئٹ شہید اعجاز نا ایڑ ہیت کرسہ پارے کہ کنے فخر ءِ کہ ای اَسہ شہید ئسے نا اُراغان تعلقداری تخِوہ و کنا ایلم شہید اعجاز بلوچ نا وڑنگا ورناتے ہر بروکا دے بدنام زمانہ سی ٹی ڈی شہید کرسا ویران آ تیٹ خسّک و پدا اسہ دروغ ءُ پریس ریلیز ئس شنگ کرسا اودے مونتس نا پن ایتک۔
شہید اعجاز نا ایڑ ودیک پارے کہ شہیداک تینا ساہ تِہ ندر کریر داسہ اوفتا مسخت ئے مونی دننگ ننا و نما ذمہ واری ءِ۔ ننے کل ئے راجی مسخت ئٹی تینا بشخ ئے ترسا تینا زات ئنا بشخ شاغوئی ءِ۔
ایسر ئٹ شہید اعجاز بلوچ نا قبر آ اونا خاہوت و سیال آتا کنڈان چادر شاغنگا و پھل چھٹنگ مس۔
یاتی مرے کہ 24 اگست 2023 آ ننکان پاکستانی لشکر قلات نا ہند مگچر ئٹی استاد میر احمد نا اُراغا چھاپہ خلک، اُرا ٹی ساڑی چنا نیاڑی تیتون اوار ایلو بندغ آتا خن تیا پٹی تفے و اوفتے کوٹی ٹی بند کرے و اعجاز احمد ئے زوراکی ئٹ تیتون اوار دریر و تُو ئسے آن پد خضدار نا ہند کھٹان ئٹی اسہ دروغ ئنا مونتس ئسیٹی اودے شہید کننگا۔
