شال آن بیگواہ کننگوک ظہیر بلوچ نا بیگواہی نا برخلاف اونا خاہوت نا کُنڈ آن ریلی ئس کشّنگا و پریس کلب نا مونا برانز کننگا۔
حوال تا رِدئٹ شال آن زوراکی ئٹ بیگواہ کننگوک ظہیر بلوچ نا آجوئی کن اونا خاہوت شال ئٹی ریلی کشا و برانز کرے ہراٹی مخلوق بھلو کچ ئسیٹی اوار مس۔
شال ئٹی مروکا ریلی ٹی برانزیک بیگواہ غا بندغ آتا عکس ہفِیسر و اوفتا آجوئی نا خْواست کریرہ۔
برانزی تتون ہیت کرسا ظہیر بلوچ نا خاہوت پارے کہ ڈاکٹر حاجی عبداللہ نا مار ظہیر احمد اسہ سرکاری ملازم اسے و ہنوکا پانزدہ سال آن پاکستان پوسٹ آفس ئٹی کلرک ئس اس۔ او بیست و ہفت جون پنچ شمبے آ دو بجہ غا تینا دفتر جی پی او شال، زرغون روڈ آن تینا اُرا کلی بنگلزئی سریاب کن پیشتماسس تو اُرا ئے سرمننگ آن مہالو اودے بیگواہ کننگا۔
اوفتا پاننگ اس کہ ظہیر احمد اسہ سرکاری ملازم اسے او ہچّو سیاسی کاریم ئسیٹ اوار متنے بیرہ خاہوتی و دتر نا سْیالی تا سوب آن ظہیر احمد و ایلو سْیال آتہ فریشان کننگک و اُرا تیا نن ئنا تہارمئی ٹی بھاز وار چھاپہ خلّنگانے۔
خاہوت نا پاننگ اس کہ ظہیر احمد ئے پاکستانی لشکر سی ٹی ڈی و ایجنسی تا کارندہ غاک شال آن زوراکی ئٹ بیگواہ کریر دا بارث ئٹ نن پریس کانفرنس ئٹی ہم اونا آجوئی نا خواست کرین ولے او یلہ متو تو نن بیوس مرسہ برانز نا کسر ئے ہلکُن۔
بیگواہ ظہیر بلوچ نا زائیفہ نا پاننگ اس کہ داکان مہالو ہم نن کیہی دے اسکان برانز کرین ریڈ زون ئٹی ہنان ننے آ لٹ کُٹ مس ولے نن تینا برانز ئے برجاء تخان ولدا انتظامیہ نا قول و اقرار آ برانز ئے چھٹفین ولے ظہیر بلوچ داسکان پھاش کننگ متنے۔
او خواست کرے کہ اگہ ظہیر بلوچ آ ڈوہ ئس ارے تو اودے عدالت آتیا ہتنگہ یا اودے یلہ کننگہ کنے و کنا چُھنا تہ دا ڈکھ آن کشّینگہ۔
شال ریلی ٹی ایلو بیگواہ کننگوک بلوچ آتا خاہوت آک، سیاسی تنظیم آتا باسک آک و خوانوک آک بھلو کچ ئسیٹ بشخ ہلکر و زوراکی نا بیگواہی تہ چھٹفنگ و بیگواہ کننگوک آجوئی نا خواست کریر۔
