بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارے کہ سرمچار آک چھانڑدہ ستمبر نا شام ئنا شش بجہ غا آواران مین بازار ئٹی ساڑی پاکستانی فوجی ہیڈ کوارٹر ئے اِرا کنڈ آن بھلا سِلاہ تیٹ ٹک کریر۔ بیست منٹ اسکان جلہو برجاء سلیس ہراٹی دشمن نا چھار کارندہ مرگ ئنا گواچی و مُسٹ ٹپی مسُر۔
او پارے کہ بی ایل ایف نا سرمچار تے تنظیم نا انٹیلیجنس ونگ حوال تس کہ آواران ہیڈ کوارٹر ئٹی فوجی افسر بریگیڈیئر حسن مہدی تینا سنگت ڈپٹی کمانڈنٹ غضنفر علی، ونگ کمانڈر 109 کرنل عدیل و کرنل منیب و ایلو افسر آتون ہیڈ کوارٹر ئٹی ساڑی ءِ۔ سرمچارک ڈھکوک محکمہ و اسپیشل ٹیم ئنا کمک ئٹ ہموتم جلہو کریر ہراتم فوجی افسرک تینا سنگت آتون کرکٹ کننگ اسُر، جلہو ئٹی دشمن لشکر نا چار کارندہ مرگ ئنا گواچی و مُسٹ بھاز ٹپی مسُر۔
ترجمان پارے کہ ارٹمیکو جلہو پانزدہ ستمبر آ سہُب ئنا ہشت بجہ و چھل و پنچ منٹ آ کننگا ہراتم آواران مشکے لنک روڈ ئنا تفنگ آ سیکیورٹی نا اِرا کارندہ غا تے پوسکن و بھلا سلاہ تیٹ ٹک کننگا ہراٹی اسہ کارندہ ئس مرگ ئنا گواچی و اسٹ بھاز ٹپی مس۔
اونا پاننگ اس کہ آواران ہیڈکوارٹر ئٹ ساڑی بریگیڈئیر حسن مہدی آواران و ہیب کھیب ئٹ لشکر کشی، بے ڈوہ آ اُلس ئنا اُراتے ہُشنگ، نشہ بہا کننگ و ڈیتھ اسکواڈ ئے متحرک کننگ و سول ملازم آتے جتا چم تیٹ دڑکو تننگ و بلیک میل کرسا بلوچ راجی آجوئی نا برخلاف کاریم ہلنگ ئٹی تُد اس، منہ دے مُست آواران ئٹی نیاڑی تے ہندا افسر نا پاننگ آ دزگیر کننگاسس۔
او ودیک پارے کہ جلہو آن پد باء تروکا دشمن لشکر تیبہ غا شار ئے گھیرہ کرسا کسر تے تفے، کس ئسے تہٹی و پیشن ہننگ نا موکل تننگ متو، کسر تے تفنگ نا وختا الس ئے تنگ کننگا و ظلم و زوراکی نا گواچی کننگا۔
میجر گہرام بلوچ پارے کہ نن ہمو کُل بندغ آتے خبردار کینہ کہ فوجی ہیڈ کوارٹر ئٹی ہننگ آن پہریز کیر و فوج ئنا پاننگ آ بلوچ راجی تحریک نا برخلاف کاریم کننگ و سرمچار تا کاریم تے مانیٹر کننگ آن پد مریر نہ تو اوفتتون ہم دشمن نا وڑ ئٹ سلوک مرو۔
او پارے کہ بی ایل ایف راجی تنظیم اسے ہرا نا تاغت بلوچ الس ءِ، بی ایل ایف نا مسخت اسہ آزاد و شرحال ءُ بلوچستان ئس ءِ ہرا بلوچ الس ئنا کُمک و تعاون ئٹ منکن ءِ، بلوچ الس تینا تیبہ تاغت و توانائی ئے بی ایل ایف ئے سوگو کننگ ئٹی ایتر ہنداٹی راجی شونداری نا ویدن ڈکھکوک ءِ۔
او ایسر ئٹ پارے کہ بلوچستان لبریشن فرنٹ دا جلہو تا زمہ واری تے ہرفک و آزاد بلوچستان اسکان ترندی ئٹ دشمن ئے ٹک کرسا کرون۔
