بلوچ یکجہتی کمیٹی تینا درشان ئٹی پارینے کہ 2 اگست آ نوشکی ٹی بلوچ راجی مُچی نا تولوک برانز آ ایف سی نا سُمکاری آن اسہ ورناس شہید و اِرٹ ٹھپی مسوسر۔ ٹھپی مروکا تیان اسٹ حکمت اللہ بلوچ ئے گُٹ ئٹی سُم ئس لگّاسس، ہرا نا چِھل دے آن علاج مننگ اس و جْوان علاج کن اودے شال آن کراچی آ راہی کننگاسس، اینو کراچی نا اسپتال ئسیٹی ٹھپ آتا سوَب آن او شہید مس۔
او پارے کہ بلوچ راجی مُچی ئے توننگ کن ریاست بلوچستان نا بھاز آ شار تیٹی زوراکی کرے ہراڑان مُسہ ورنا شہید مس و سی ئنا کچ ٹھپی مسر۔ شہید حکمت بلوچ ہم ہمو ٹھپی مروکا تیٹ اوار اس ہرا جمعہ نا دے کراچی ٹی شہید مس۔ راجی مُچی آ بروکا کاروان و پدا تولوک برانز آتیا مروکا جلہو تیٹی ٹھپی مروکا تا دائسکان ہم بھاز آ اسپتال تیٹی علاج مننگ ئٹی ءِ ہرافتیان گِڑاسے نا حالیت ہم خراب ءِ۔ اوفتیٹ مستونگ آن تعلقداری تخوک مطلّب بلوچ ہم اوار ءِ۔
او مُستی پارے کہ ریاست بلوچ اُلس ئنا سیاسی و راجی جہد آن خُلینگ ئٹی ءِ ہندا خُلیس نا سوَب آن او دا جہد ئے چُھٹفنگ کن زوراکی کننگ ئٹی ءِ۔ ولے غُٹ زوراکی تیان پد ہم ریاست بلوچ اُلس ئنا جوزہ آتہ شیف کننگ ئٹی بےسوب مسّنے۔
او پارے کہ بلوچ زنک ایسری نا برخلاف مروکا دا جہد ہندا زوراکی تا گْواچی ءِ ہرادے ریاست بلوچ زنک ایسری کن کننگ ئٹی ءِ۔ ننے یخین ءِ کہ بلوچ اُلس ئنا قربانیک اسہ دے ئس الم رنگ ہتور و بلوچ ڈیہہ آن ظلم و تادی مدامی کن ایسر مرو۔ زوراکی و غرور نا کاٹم شیف مرو و بلوچ راج ئنا جہد سرسوب مرو۔
او مُستی پارے کہ شہید حکمت اللہ بلوچ نا قربانی ئے مدام یات کننگو و دا قربانیک بلوچ راجی جہد ئکن کسر نا چراغ مرور۔
