بلوچستان نا دریابی شار گوادر آن رسینگوکا حوال تا رد ئٹ گْوادر دشت دور کنڈگ نا ہند آن پاکستانی لشکر اَسہ ورنا ئسے دزگیری آن پد بیگواہ کرینے۔
گوادر آن پاکستانی لشکر نا دو آن زوراکی ئٹ بیگواہ کننگوک بندغ نا چاہنداری عمر نا مار زبیر نا پن ئٹ مسُنے۔
بلوچستان ئٹی زوراکی نا بیگواہی تا تُدینی تیٹ ودکی مننگ ءِ۔ درو نن نیمہ غا پاکستانی لشکر کوئٹہ آن اِرا بلوچ وکیل دزگیر کرسا بیگواہ کرینے، اندن بلوچستان نا ضلع کیچ آن مُسہ بندغ نا زوراکی ئٹ بیگواہی نا حوال ہم مونا بسس۔
بلوچستان ئٹی زوراکی نا بیگواہی تیا کاریم کروک تنظیم وائس فار بلوچ مسنگ پرسنز و بلوچ یکجہتی کمیٹی زوارکی نا بیگواہی تا تُدینی تیٹ ودی آ فریشانی نا درشانی کرسا پارینو کہ پاکستانی لشکر بیدس عدالت بندغ آتے زوراکی ئٹ بیگواہی نا گواچی کننگ ءِ۔
تنظیم آک بندغی حق آتا ادارہ و جہانی راج آ تیان خواست کرینو کہ او دا تُدینی تا نوٹس ہلِسہ زوراکی نا بیگواہی تے توننگ و بیگواہ غا بندغ آتا آجوئی کن تینا کڑد ءِ سر تیر۔
