بلوچستان نا ضلع قلات ئٹی نادرست آ بندغ آک پاکستانی لشکر نا اُلاخ ئسے بمب جلہو ئٹ ٹک کرینو۔
حوال تا رد ئٹ جلہو ئٹ پاکستانی لشکر نا ہشت کارندہ ٹپی مسنو۔
ڈپٹی کمشنر قلات بلال شبیر آئی ای ڈی تراک ئٹ کارندہ غا تا ٹپی مننگ ئے پک کرینے۔
او پارینے کہ نادرست آ بندغ آک تراکیئو ڈیوائس ئس کسر نا کرک آ تخاسر، ہراتم سیکیورٹی کارندہ غاک اوکان گدرینگ اسر ہموتم تراک مس ہراڑان ہشت سیکورٹی کارندہ ٹپی مسنو۔
تراک نا حوال رسینگ آن گڈ لیویز تون اوار ایلو سیکورٹی کارندہ غاک علاقہ ئے گھیرہ کریر و پٹ و پول بناء کریر۔
ٹپی مروکا کورندہ غا تے جانجوڑی کمک کن اسپتال آ دننگانے۔
