
حوال تا رد ئٹ امریکہ نا محکمہ خارجہ پنچ شمبے نا دے اسہ چینی ریسرچ انسٹی ٹیوٹ و کیہی اندنو کمپنی تیا رکھ خلکنے ہرافتا بارث ئٹ پاننگک کہ او پاکستان نا بیلسٹک میزائل ڈٹ تیکن مڈی فراوان کننگ ءُ۔
واشنگٹن اکتوبر 2023 ٹی ہم چین ئنا مُسہ کمپنی آ پاکستان ئے میزائل تا رد ئٹ مڈی فراوان کننگ آ اندن رکھ خلکسس۔ چین دانا سختی ئٹ مخالفت ئے کرینے۔
محکمہ خارجہ نا ترجمان میتھیو ملر اسہ بیان ئسیٹی پارینے کہ “بیجنگ ریسرچ انسٹی ٹیوٹ آف آٹومیشن فار مشین بلڈنگ انڈسٹری” شاہین 3 و ابابیل سسٹم و مننگ کروک بھلا سسٹم تا راکٹ موٹر تا آزموندہ کن مڈی بہا کننگ کن پاکستان تون کاریم کرینے۔
ملر پارینے کہ دا رکھ آتیٹ چین ئنا مُسہ فَرم، Hubei Huachangda Intelligent Equipment Co, Universal Enterprise, و Xi’an Longde Technology Development Co ئے، و پاکستان ئٹی ساڑی Innovative Equipment آن بیدس اسہ چینی شاری سے، ہامدیکا دنو مڈی دننگ نا سوب آن ٹک کننگانے ہرا میزائل ٹیکنالوجی آ رکھ آتیٹ بریرہ۔
ملر پارینے کہ، “اندن کہ اینو دا گھامک پھاش کیرہ، امریکہ سلاہ تا تالان کننگ و دا بارث ئٹ ہڷ ءَ تس نا کاریم تا برخلاف ءِ، و ہراڑے ہم دا کاریمک مسر اوفتیا کارروائی کننگو۔”