زرمبش نوشتانک
بر داڑے تولین دا جوانو جاہ اسے پالُن اف ۔۔۔
ہمے دے دیگر نا وخت اس بشام نا پِرک اسر ہڑدے ویگہ تماکہ بس پِر ئنا پھدین آ پھڑینک آک دوزخی آ باسنی ئے زرس کم کرِسہ ویگ ئتون سر مسرہ، بندغ و ساہدارک گل و بال اسر مُد زیبا اس خرُنی تالان مسس ہر پارہ غان ڈغار شعر پارِسہ رقص کریکہ و خدا نا قدرت زیات زیبا اس پُھلاک بشخندہ کننگ اسر چک آتا چڑ چڑ نا توار ئٹ ہنینو ساعت ئس جوڑ مسس ۔۔۔
ہئو دا جوانو جا اسے بر زرس خنیو نے واپس سماء اف خنیوہ نے یا امر اندُنی ٹی سنگت ٹاکو ئس خلک کنا پارہ غا مہر ئٹ ہُننگ اس، سنگت خیر ءِ اینو دا وڑ خوئش اس، کنا پھل نے سماء ءِ؟ ” سنگت سارین نا پاننگ اس“ کنے کنا لمہ توار کننگ ءِ۔ سنگت دلوش سوج کرِسہ پارے ہرا لمہ ؟ نا لمہ تو نیتون ءِ نا خلق ئٹی ءِ گڑا اَرا لمہ نا پاننگ اس؟ او کنا سادہ انگا گنوکو آ سنگت ای لمہ وطن نا پاننگٹ، ” دلوش “ گڑا انت پائک لمہ وطن نا؟ کنے پائک بر کنے آ ای نیکن زہیری اٹ نی کنکن دتر ایتک نی کنے آجو کر تینا ڈیہہ ئنا آجوئی نا جہد ئٹی بروکا نسل ئنا آسراتی کن، زمزیر ئٹ تفوکا بیگواہ غا چناتیکن، لمہ ایڑتا ہکل اوفتا خواری تیکن و پیر انگا لمہ و باوہ آتیکن، کنے توار کننگ ءِ اونا توار کنے خاچنگ الیپک اونا توار کنے جارات تفک، ای سہب ئنا بش مریوہ کنا لمہ بریک کنا دوٹی ہلیک پائک نی کنکن جوڑ اس نی کنا ایلو مار تا وڑ اس ہرا کنکن شہید مسنو کنکن دتر تسنو ، کنا ضمیر ئے سُرفک کنے پائک اینو خاچوس ننا راج ئنا پگہ تارمہ مرو نی بر راج ئنا بروکا وخت ئے روشن کر۔۔۔ اندنی ٹی سارین نا خنک خڑینکی مسر بشخندہ ئس کرِسہ تینا سنگت ” دلوش“ ئے ہُرِسہ پارے گڑا اینو ای نے رخصت کننگ کن بسونٹ ای تینا لمہ غا کاوہ ہمو لمہ ہرا نا خمب ئکن ای گنوک اُٹ ہرانا مہر ئنا سیخا کن زہیری اٹ ہرا کنے نن و دے توار کیک کہ سارین نی بر ای نا ودار اٹ، اینو ای کاوہ نن اوارن ہر رُدوکا پھل ئٹی ہر ویگ ئنا بروکا جھمر و اونا پھڑینک آتیٹ نن اوارن ایڑ ئسے نا بشخندہ و لمہ ئسے نا تینا مار ئنا ودار ئٹی نن اوارن ۔۔۔
اندنی ٹی سارین بش مس پِر ئنا سوب چنکا چنکا کڈ آک دیر آن پُر مسوسر تینا سنگت دلوش ئے بھاکر کرِسہ اندا کڈ آتیان درِک خلک کنا و نا بروکا پگہ کن لمہ نا توار کن تینا زمزیر تیٹ تفوک ایلم تیکن مُر مش تیا ہنِسہ اس و دلوش نا خنک خوئشی نا خڑینک آتیان پالن اسر پدی چک خلِسہ سارین نا پارہ غا ہُننگ اس و سارین تینا مزل نا کنڈ آ تینا اسہ قلم و کتاب تون اوار ہنِسہ ہنِسہ مش تیان ہیپار مس۔
