درو کوئٹہ ٹی رسالت نا بےشرفی نا دوبہ ٹی دزگیر مروکا ڈوہدار ئے کینٹ تھانہ نا لاک اپ ئٹی پولیس کارندہ ئس سُمکاری کرسا کھسفنے۔
کھئوکا بندغ نا چاہنداری سپاہی سید خان نا پن ئٹ مسنے۔ پولیس نا رد ئٹ ڈوہدار ئے دزگیر کننگانے۔
سُمکاری نا تدینی کوئٹہ کینٹ پولیس تھانہ ٹی مسنے۔
یاتی مرے رسالت نا بےشرفی نا دوبہ ٹی درو مُلا تا برانز آن گڈ پن کروک بندغ ئے دزگیر کننگاسس۔
کھئوکا بندغ آ درو مُلا تا کنڈ آن رسلات نا بےشرفی نا دوبہ خلنگاسس و درو سہب ئنا دے کہی بائی پاس آ مُلاک برانز کریسر ہراکان گڈ پولیس اودے دزگیر کرسا خروٹ آباد تھانہ غا دریسس۔
ہراکان گڈ مُلا و طالب آتا بھلو کچ ئس خروٹ آباد تھانہ نا مونا مُچ مسس و مُچی خروٹ آباد تھانہ ٹی پُترینگ نا کوشست کریسس و پولیس تھانہ نا بنجائی درگہ ئے پرغنگ نا کوشست کریسس۔
پولیس برانزی تِہ دانگ اینگ کننگ کن تہو ٹی سمکاری کریسس و آنسو گیس نا شیلنگ کریسس ہراکان گڈ برانزیک دانگ اینگ مسوسر و پولیس نا بھلو کچ ئس پولیس تھانہ غا سیکورٹی کن خواہفنگاسس۔
اینو حوال رسینگانے کہ رسالت نا بےشرفی نا دوبہ ٹی دزگیر مروک بندغ ئے تھانہ نا تہٹی پولیس نا اسہ بندغ ئس سمکاری کرسا کھسفینے۔
