بلوچستان نیشنل پارٹی نا موہکش سردار اختر مینگل پارینے کہ بھاز شرف ئٹ پاننگ خواہوہ کہ بلوچستان و سندھ ہڑتُما ہند آتیٹی پیپلز پارٹی نا حکومت ءِ، و ہڑتُما جہہ تیا ایمنی ئٹ برانز کننگ نا موکل تننگ مفک۔
او پارے کہ لیاری و ملیر نا بلوچ نرینہ نیاڑی و چُناک، ہرا ساندہ پیپلز پارٹی ئے ووٹ ایترہ، اوفتے صوبائی حکومت نا کنڈ آن بیدادی تتون مون تروئی تمک۔ کنا استعفی غا افسوز کننگ نا جاگہ غا اگہ بلوچستان ئٹی مروکا زیاتی، بلوچ زنک کشی و بےانصافی تیا پام تننگ مسکہ و اوفتا ازالہ کننگاکہ، تو اینو افسوز بکار متوکہ۔
سردار مینگل پارے ولے افسوز نا درشانی آن ہچ مروف۔ ننے منوئی تمو کہ مسلم لیگ (ن) و پیپلز پارٹی آن بارنگا تپہ غاک ہم دا ڈیہہ ئے دا ہند اسکان سر کننگ ئٹی بریبر نا کڑد سر تسنو۔ داسا بکار دا ہیت ئنا ءِ کہ دا تلہ غاک حالیت آتے مٹ کننگ ئٹ سوبرو گھام ہفر و مظلوم آ الس ئنا حق آتے رکھیر۔ نُم کُل ننے دا دے ئے نشان تسرے کہ کنا ووٹر آک کنا استعفیٰ آ خوشی کننگ ءُ۔ دا کنا ووٹر آتا و بلوچستان نا فیصلہ ءِ، و دا سوچنگ بکار ءِ کہ اوفتے دا ہند آ سر کروکا و دا خواست کننگ آ دیر بیوس کرینے۔
