بلوچ نیشنل موومنٹ نا بندغی حق آتا ادارہ "پانک” تینا تُوئی رپورٹ ئے شنگ کرینے ہرا نا رد ئٹ بلوچستان ئٹی بندغی حق آتا گیشتر لتاڑ مننگ ئٹی ءِ۔
رپورٹ نا رد ئٹ اگست اِرا ہزار بیست و چھار (2024) ئٹی بلوچستان نا یانزدہ ضلع تون اوار کراچی آن ہم زوراکی نا بیگواہی تا حوال رسینگانے ہرافتیٹ غُٹ آن زیات کیچ آن بیگواہ کننگوکا بھاز ءُ ہندن مچا بلوچستان آن چِھل و چھار (44) بندغ ئے پاکستانی لشکر و اونا ادارہ آک دزگیر کرسا زور ئٹ بیگواہ کرینو۔
پانک بےقانودی کھسفنگوکا تا حوال ئے ترسہ پارے کہ ہلوک دروکو پنچ بندغ ئے خضدار ئٹی پاکستانی لشکر کھسفینے، آواران ئٹی ماسٹر عبدالخالق، کولواہ ڈنڈار ئٹی پنچ سال ئنا چُنا ستارہ ہم ہموفتیٹ اوار ءُ ہرافتے پاکستانی لشکر سم کاری کرسا کھسفینے۔
بیست و ہفت اگست آ پنجگور ئٹی ایف سی سجاد و کامران پِنیئو اِرا ورنا ئے کیمپ آ خواہیفسہ ہندنو سوغند نامہ ئسے آ دسخط کننگ نا پاریسس ہرانا حساب آ ہڑتوماک سِلاہ بند تنظیم ئسے نا باسک ءُ و سِلاہ بِٹنگ ئٹی ءُ۔ ولے او دا دروغ ئنا سوغند نامہ آ دسخط کتّوس تو کیمپ آن ولدا بنّنگ ئٹی کسر آ اوفتے کھسفنگا۔
پانک پاکستانی سیم آن پیشن پاکستانی لشکر نا ڈھکوک ادارہ آتا کاروائی تیا فریشانی نا درشانی کرے، پانک ئنا رپورٹ نا رد ئٹ چھار اگست 2024 آ بلوچستان نا ضلع آواران نا ہندی داد شاہ نا مار صابر بلوچ، ئے دے کہی بلوچستان نا علاقہ سراوان ئٹی پاکستانی لشکر نا ایجنسیک کھسفیر۔ اسہ پین کاروائی ئسیٹی 28 اگست 2024 آ بلوچستان نا ضلع کیچ ئنا تحصیل تمپ گومازی نا ہندی محمد نا مار اختر بلوچ ئے ہم دے کہی بلوچستان نا علاقہ دشتیاری ٹی کھسفیر۔
پانک ئنا پاننگ کہ دے کہی بلوچستان ئٹی چرجوئی ئٹ ٹارگٹ کلنگ نا گواچی مروکا بلوچ باہوٹ آک قانودی، راہبندی و چاگڑدی رکھ آتیا پد تنوک ءُ ہراڑان بے وطن رلوکا بندغ آتا زند بد آن بدتر مسنے۔ دا ویل آ کیہی وار پان ترفنگانے ولے جہانی ادارہ آک و ذمہ وار کوالخواک دا بندغ آتے بندغی بنداو آ کمک تننگ افس۔
پانک خْواست کرینے کہ بلوچ باہوٹ آتے اوغانستان و دے کہی بلوچستان ئٹی باقاعدہ باہوٹ درجہ تننگ و بندغی حق آتا جہانی ادارہ آتا بھلنی ٹی اوفتا رکھ ئنا بکار ءِ۔ ہرا وڑ اوغانستان ئٹی جنگ ئنا وختا اوغان باہوٹ آتہ ایران و پاکستان ئٹی باہوٹ قبول کننگا و اوفتیکن بندغی بنداو آ کمک تنّنگ نا کسر ملفنگا ہندا وڑ بلوچ باہوٹ آتہ ہم اوفتا حق رسینگہ و پاکستانی لشکر نا دے کہی بلوچستان و اوغانستان نا سیم تا تہٹی کاروائی تیا اوفتیان حساب ہلنگ مرے۔
رپورٹ ئٹ ودیک پاننگا کہ زوراکی ئٹ بیگواہ کننگوک بندغ آک یلہ مننگ آن پد ہم رکھوک افس۔ بلوچستان نا ضلع کیچ ئنا بنجائی شار تربت ئٹی وشدل نا مار عابد پِنیئو ورنا سے پاکستانی لشکر نا ہندی لشکر (ڈیتھ اسکواڈ) نا کارندہ آک سُم کاری کرسا ٹھپی کریر۔ عابد بلوچ بیست و یک مارچ 2023 آ پاکستانی لشکر نا دُو آن زوراکی ئٹ بیگواہی آن پد یلہ مسّس۔
رپورٹ ئٹی پاننگا کہ داکان مُست ہم دہن مسّنے کہ زوراکی ئٹ بیگواہ کننگوک بندغ آک یا عدالت آن بری مروکا بندغ آ تِہ دوارہ زوراکی ئٹ بیگواہ کننگانے یا بےقانودی کھسفنگانے۔ ٹارگٹ کلنگ ہم بلوچستان ئٹی پاکستانی لشکر نا کاریم نا اسہ وڑ اسے ہرا نا زریعت ئٹ ہمو بندغ آ تہ کھسفنگک ہرافتے او دوست تخپک۔
پانک ئنا کنڈ آن پاننگا کہ زوراکی ئٹ بیگواہ کننگوکا بندغ آتا نفسیاتی و جسمانی جانجوڑی و، جان و مال ئنا رکھ و چاگڑد ئٹی ولدا لس شاری نا وڑ ئٹ رہینگنگ نا خْیال ئے تخنگ مرے، دا بارث ئٹ بندغی حق آتا ادارہ آک کاریم کیر۔
