سوراب نا ہندی زوراکی ئٹ بیگواہ کننگوک سیف اللہ رودینی نا ایڑ فرزانہ رودینی پارینے کہ کنا ایلم سیف اللہ رودینی پولیس کانسٹیبیل ئس اسک و اودے 22 نومبر 2013 آ سوراب آن خضدار ڈیوٹی آ ہننگ نا وختا زوراکی ئٹ بیگواہ کننگاسس، ہرا دائسکان بیگواہءِ۔
او پارے کہ بلوچستان پولیس اونا آجوئی کن گامگیج ہرفنگ نا جاگہ غا اودے نوکری آن کشا و اونا تنخواہ ئے بند کریر، ہرانا سوب آن ننا خاہوت سخت معاشی ویل آتا گواچی ءِ۔
او پارے کہ سیف اللہ ننا خاہوت نا کھٹیا کروکا اسٹ انگا بندغ اسک و اونا زوراکی ئٹ بیگواہی آن پد نن سخت معاشی ویل آتتون مون تننگ اُن ہرا اسہ اشتماعی سزا نا گندہ غا دروشم ءِ۔
فرزانہ رودینی چیف جسٹس سپریم کورٹ، آئی جی پولیس بلوچستان و بندغی حق آتا تنظیم آتیان خواست کرے کہ اوفک سیف اللہ رودینی نا تنخواہ تے تننگ تون اوار اونا آجوئی کن گامگیج ہرفِر، تاکہ ننے دا اذیت آن شفا رسینگے۔
