شاری، سیاسی باسک و اوفتا سیال آتا پِن تے دہشت گردی نا واچ لسٹ ئٹ شاغِسہ حکومت اوفتے حق ئنا جنگ آن توننگ نا کوشت کننگ ءِ۔
بلوچ یکجہتی کمیٹی نا آرگنائزر و سیاسی راہشون ڈاکٹر ماہرنگ بلوچ چاگڑدی حوالکاری تلہ ایکس آ پوسٹ کرسا پارینے کہ بلوچستان حکومت ملٹری اسٹیبلشمنٹ نا پاننگ آ ہزار آ بندغ آتا پن تے فورتھ شیڈول ئٹی شاغِسہ بھلو کچ ئسیٹی منظم زیادتی کننگ ءِ۔
ماہرنگ بلوچ دا رد ئٹ ودیک پارے کہ بیرہ کوئٹہ ئٹ جولائی ٹی 137 بندغ نا پن تے فورتھ شیڈول ئٹی اوار کننگانے، ہرافتیٹ خوانندہ، باسک، نوشتکار، لیکچرر و پروفیسر اوار ءُ۔
او پارے کہ حکومت نا کُنڈ آن شنگ کروکا دا لڑ ئٹی کنا ایلم ناصر بلوچ ہم اوار ءِ ہرا داکان مُست زوارکی ئٹ بیگواہی نا گواچی مسُنے و اونا ہچو وڑ ئنا سیاسی سرگرمی تتون تعلقداری اف، پر ایمن شاری یا باسک آتا خاہوت نا بندغ آتے پِن ئنا انسداد دہشت گردی نا واچ لسٹ ئٹ اوار کننگ بلوچستان ئٹ بلوچ اُلس ئنا برخلاف زوراکی نا اَسہ بھلو مہم ئسے نا بشخ ءِ۔
بلوچ راہشون نا پاننگ اسک کہ حکومت بلوچستان ئے اَسہ بھلو کچ ئسیٹ دزگیری کیمپ ئٹ بدل کننگ ءِ، ہمر کہ چین ئنا کُنڈ آن سنکیانک نا خودمختار ہند آتا صورتحال ءِ ہرافتے دزگیری کیمپ آ تیٹ بدل کننگانے، و دُہنا گام تا مسخت ریاستی ظلم ئے پین ودِفنگ و حق ئنا توارے ئے بند کننگ نا کوشست ءِ۔
ماہرنگ بلوچ پارے کہ بلوچ دُہنا عمل تا برخلاف مزاحمت کرو، سول سوسائٹی، میڈیا، بندغی حق آتا جہانی تنظیم و سیاسی اسٹیک ہولڈر تیان قانود نا دا گندہ غا کارمرز نا برخلاف توار بُڑز کننگ نا خواست کیوہ۔
