کرد و ترک چپ دو ئنا دہ تنظیم تا سیوت “پیپلز یونائیٹڈ ریوولیوشنری موومنٹ” استنبول ئٹی اسہ جلہو ئسیٹی شیلی پلازہ ٹی سروس گاڑی تے ٹک کرے و تیبہ غا پلازہ ئے خاخر تس۔
ترکش میڈیا نا ردئٹ سلاہ بند بندغ آک اسہ سرکاری ماڑی ئسیٹی پیہِسہ اوڑے سلوک اُلاخ و ایلو گڑاتے خاخر تننگ آن پد نرار۔
کرد و ترک چپ دو ئنا ٹولی تا سیوت ”ایچ بی ڈی ایچ“ نا پارہ غان شنگ کروک بیان ئٹی تنظیم نا کنڈ آن دا آپریشن نا ذمہ واری ہرفنگا، و دا پاننگا کہ دا کارروائی ریاستی تادی و کرد راہشون عبداللہ اُجلان نا دزگیری نا برخلاف اوفتا مزاحمت نا بشخ اسے۔
دا ٹولی تینا جلہو ئے بلوچستان نا آجوئی دوست سلاہ بند تنظیم بلوچ لبریشن آرمی نا جندندر ماہل بلوچ عرف زیلان کرد و رضوان بلوچ عرف حمل نا پنا کرسا اوفتا قربانی تِہ دروت ندر کرینے۔
دا آپریشن اندنو وخت ئسیٹی مونا بس ہراڑے تدوکا تو بلوچ لبریشن آرمی بلوچستان ئٹی آپریشن ہیروف ئٹ پاکستانی لشکر و تنصیب آتے ٹک کریسس۔ پن کروک جلہو ئٹ بشخ ہلوک جندندر رضوان بلوچ و ماہل بلوچ عرف زیلان کرد اوار اسر۔ بلوچ لبریشن آرمی نا ردئٹ ماہل بلوچ زیلان کرد نا پِن ئے کرد آجوئی دوست زینپ قناسی آن زیمی مرسا گچین کریسس۔
یاتی مرے پیپلز یونائیٹڈ ریوولیوشنری موومنٹ کرد و ترک چپ دو ئنا گروپ آتا اسہ سیوت اسے ہراٹی ترکی تون اوار شام و عراق ئٹ متحرک کرد آجوئی دوست پارٹی و ترکی نا چپ دو ئنا سوشلسٹ تنظیم آک اوار ءُ۔
