بلوچ لبریشن آرمی نا ترجمان جیئند بلوچ تینا شنگ کروک بیان ئٹی پارینے کہ ننا سرمچاراک تربت، نوشکی، پنجگور و بارکھان ئٹی کوزہ گیر پاکستانی لشکر، مال و مڈّی دروکا گاڈی، و دشمن نا جہی آ کارندہ و ٹاور تہ ٹِک کرینو۔
او پارے کہ سرمچاراک جمعہ نا شام تربت شار ئٹی پاکستانی لشکر نا یک سد و شست و ہشت ونگ ئنا چوکی آ سلوکا کارندہ آتا دستی بمب ئٹ جلہو کریر ہراٹی دشمن نا مسہ کارندہ ٹھپی مسر۔
او ودیک پارے کہ اسہ پین جلہو ئسیٹی، سئے ستمبر اِرا ہزار بیست و چھار نا شام سرمچاراک سر مَل نوشکی ٹی مال و مڈّی دروکا گاڈی تیا جلہو کرسا اسٹ ئے ہُشار و ایلو نا ٹائر آ تہ خلکر۔
اونا پاننگ اس کہ اِرا ہفتہ مہالو سرمچاراک گچک پنجگور آن پاکستانی لشکر نا جہی آ کارندہ مراد (ڈولی) ئے ہلکر۔ بہرام نا مار مراد (ڈولی)، گچک لاٹیار نا ہندی ہنوکا کیہی سال آن پاکستانی لشکر کن کاریم کریکہ۔
او پارے کہ سر سوج نا وختا او منّا کہ او گچک، گوارگو، دراسکی ٹی فوجی لشکرکشی ٹی کوزہ گیر لشکر ئے کمک تسّنے و لشکرکشی ٹی لس مخلوق نا اُرا تِہ ہم ہشنگ ئٹی اوار مسّنے۔
مراد (ڈولی) دا ہم منّا کہ او سردار علی حیدر محمد حسنی نا نائب غلام سرور ساجدی نا بھلنی ٹی جہی آ ریاستی لشکر (ڈیتھ اسکواڈ) نا بشخ مسّنے و بلوچ آجوئی دوست آتا کسر تہ پیدَوار کرسا کرینے۔
ریاستی کارندہ منّانے کہ اگست2020 ئٹی پنجگور، گچک و ہیب ءَ کھیب ئٹ ہشت دے اسکان برجاء غا فوجی لشکرکشی ٹی او کوزہ گیر پاکستانی لشکر تون تُد مسنے و اوڑے بی ایل اے نا سرمچار آصف (فدا) باوہ نا پِن لال جان و گلاب (وحید) باوہ نا پِن پھلان، نا شہیدی ٹی اونا دُو مسنے۔
او پارے کہ مراد (ڈولی) ئے راجی غداری آ بلوچ راجی عدالت مرگ ئنا سزا بنفے، ہراڑا درو بی ایل اے نا سرمچاراک عمل کریر۔
ترجمان جیئند بلوچ پارے کہ سرمچاراک چھار ستمبر اِرا ہزار بیست و چھار آ چھودی بارکھان ئٹی یوفون کمپنی نا موبائل ٹاور ئسے ہم جلہو ئسیٹی بُھس کرینو۔
