زوراکی ئٹ بیگواہ کننگوک ڈاکٹر عبدالحئی بلوچ نا ایڑ پارینے کہ اگہ کنا ایلم دہ دے اسکان یلہ متو تو نن ڈی ایچ کیو اسپتال آواران ئے قلف خلِسہ اونا مونا تولِسہ برانز کرون۔
شال ئٹی بیگواہ تا کیمپ آن میڈیا ئے پریس ریلیز ئٹی آواران آن زورئٹ بیگواہ کننگوک ڈاکٹر عبدالحئی بلوچ نا ایڑ پارینے کہ بلوچستان بھلو وخت ئسے آن زوراکی تا گْواچی ءِ، ہڑدے خواننگ جاہ، دفتر، کلینک و اُرا تیان ورنا تہ زورئٹ بیگواہ کننگک۔ دا روشن آ چراغا تہ تُو تا تُو و سال آتِسکان تہارمہ غا کوٹھی تیٹی بند کننگک۔
او پارے کہ بیدی آواران ٹی تُولوک و ڈی ایچ کیو آواران نا آپریٹنگ تھیٹر اسسٹنٹ، ڈاکٹر عبدالحئی بلوچ ئے یک جون اِرا ہزار بیست و چھار آ زورئٹ بیگواہ کریر، اودے ایف سی و ایجنسی تا کارندہ آک اونا کلینک آواران نوندڑہ آن اونا خن تہ تفسہ توفنک نا زور آ درینو۔ ہمو دے آن اینو اسکان عبدالحئی بلوچ بیگواہ ءِ و ننے اونا ہِچ ڈس رسینگ ئٹی اف۔
او پارے کہ دا بیرہ اینو نا ہیت ئس اف بلکہ آواران آن بارنگا پد تمّوکا علاقہ آتیٹ ہڑدے اُرا تیا چھاپہ خلّنگک، ہراڑے نیاڑی، چُنا و پیرنگا تہ بیہار تنّنگک و لَٹ کُٹ کننگک۔ و اوفتا بندغا تہ اوفتا خن تا مون آن بیگواہ کننگک۔
ڈاکٹر عبدالحئی نا ایڑ ئنا پاننگ ءِ کہ آواران نا ڈی ایچ کیو اسپتال نا اسٹاف ئے ہم اسہ رنگ بیگواہ کننگانے ولے حکومت داڑا ہِچ ئس کننگ ئٹی اف بلکہ حکومت اینو ہم بےپرواہ ءِ۔
او پارے کہ اگہ ریاست ہندن چُپ سلیس تو ڈاکٹر عبدالحئی بلوچ نا خاہوت نا کُنڈ آن بھلو گام ہفّنگو داسا ننے آن دا ڈکھ آتا زند و حاکم آتا چُپی ہِچ وڑئٹ سگّنگ مفک۔
ڈاکٹر عبدالحئی بلوچ نا ایڑ پارے کہ ای دا پریس کانفرنس نا کمک ئٹ ساڑی آ حکومت و زمہ وار تہ پاننگ خواہیوہ کہ دہ دے اسکان اگہ کنا ایلم یلہ متو تو بیوس مرسا نن ڈی ایچ کیو اسپتال آواران ئے کُلف خلون و مون آتَہ برانز کرون، و دا برانز ہمو وخت اسکان برجاء مرو ایتم اسکان کہ ڈاکٹر عبدالحئی بلوچ آجو متنے۔
او مُستی پارے کہ اگہ دا نیام ئٹی ننے ہنت وڑ ئنا نسخان ئس مس تو اونا مچّا زمہ وار ریاست مرو۔
