
کوہلو ٹی لوڑو تیان زیمی مروکا بندغ آک اَسہ پریس کانفرنس ئس کرسا پارینو کہ پروینشل ڈزاسٹر منیجمنٹ اتھارٹی نا کنڈ آن لوڑو تیان زیمی مروکا تیکن رادہ کروکا مڈی تے اوفتے اِسکان سر کننگ نا جاگہ غا ڈسٹرکٹ پریس کلب نا صحافی تیٹ بشخنگ ئٹی ءُ۔
زیمی مروکا تا پاننگ ءِ کہ دا بے انصافی ئٹ بشخنگ نا مسخت میڈیا نا اواری و تینا ستا کرفنگ ءِ، و ایلو مڈی تے مسکین آ بندغ آ تیٹ بشخنگ نا جاگہ غا تینٹ ہرفنگ نا ءِ۔
او پاریر کہ دا کل چم بازیک لیویز فورس ئنا انتظام ئٹی مسُنو و کل مڈی تے لیویز فورس ئنا ایف ٹی آر سر کرینے۔
او ودیک پاریر کہ تُدوکا شام لیویز نا کمک ئٹ سیلاب آن زیمی مروکا تے راشن آن پُر اَسہ ٹرک ئس ڈسٹرکٹ پریس کلب ئٹی بشخنگانے۔
او سوج کریر کہ حکومت وخت و ضلعی انتظامیہ دا ہیت آتا وضاحت ئے کیر کہ اَرا قانود نا رد ئٹ لوڑو آن زیمی مروکا مسکین تا راشن تے ڈسٹرکٹ پریس کلب ئٹی ہورک کرسا صحافی تیٹ بشخنگانے۔
لوڑو تیان زیمی مروکا تا خواست ءِ کہ انتظامیہ دا عمل نا نوٹس ہلِسہ زمہ وار آتا برخلاف کاروائی کے نہ تو مخلوق تینا حق کن برانز نا کسر ءِ گچین کرو۔