وائس فار بلوچ مسنگ پرسنز نا چیرمین نصراللہ بلوچ تینا بیان ئٹی پارینے کہ میر زمان سمالانی و احمد نواز سمالانی نا زوراکی نا بیگواہی نا شابیت آتے خاہوت آک وی بی ایم پی ئے تسنو۔
او غاو کرینو کہ برجاء سال ئنا 4 فروری آ شاہ زمان نا مار میر زمان سمالانی و خدائے رحیم نا مار احمد نواز سمالانی و ثناء بنگلزئی مچھ آن کوئٹہ آ بننگ اسر کہ ڈیگاری ایف سی پوسٹ آ پاکستانی لشکر اوفتے دزگیر کرسا زوراکی ئٹ بیگواہ کرے۔
خاہوت آک پاریر کہ ایلو دے ثناء بنگلزئی ئے یلہ کریر ولے میر زمان سمالانی و احمد نواز سمالانی دائسکان بیگواہ ءُ۔
خاہوت غاو کرینے کہ اوفتے تینا بیگواہ غا بندغ آتا بارث ئٹ ہچو معلومداری تننگ متنے ہرا نا سوب آن او بھاز ذہنی اذیت ئٹی ءُ۔
چئیرمین نصراللہ پارے کہ تنظیمی سطح آ خاہوت آتے باور ترفین کہ میر زمان سمالانی و احمد نواز سمالانی نا کیس ئے بیگواہ غا بندغ آتیکن جوڑ مروکا کمیشن و حکومت ئے ایتون و تومکا تا رکھوک آجوئی کن ہر تلہ غا توار بڑز کرون۔
نصراللہ بلوچ حکومت آن خواست کرے کہ او میر زمان سمالانی و احمد نواز سمالانی نا زوراکی نا بیگواہی نا کا نوٹس ہلِسہ اوفتا رکھوک آجوئی نا باور ترفِہ و اگہ اوفتیا دوبہ ارے تو اوفتے پاش کرسا عدالت آ ہتنگ مرے۔
ایلو کنڈ آن بلوچستان نا بنجائی شار کوئٹہ ٹی پاکستانی لشکر نا دو آن زوراکی ئٹ بیگواہ کننگوک اِرا بندغ آجو مسنو۔
11 اگست 2023 آ پاکستانی لشکر نا دو آن بیگواہ مروک ڈاکٹر رفیق احمد و یکم ستمبر 2023 آ بیگواہ مروک کمالان دشتی، تومکا اینو کوئٹہ آن آجو مرسا اُراغا سر مسنو۔
تومکا تا آجوئی ئے بلوچ نیشنل موومنٹ نا بندغی حق آتا ادارہ پانک چاگڑدی حوالکاری میڈیا غا کرینے۔
