شابیتی حوال تا رد ئات بلوچستان نا ضلع کوہلو ٹی بلوچ اسٹوڈنٹس آرگنائزیشن (پجار) نا نیمہ غان آرٹ کمپیٹیشن اڈ تننگا، ہراٹی جتاء اسکول تا خوانندہ و آرٹ ئنا شعبہ ٹی دلچسپی تخوکا ورناک ہم بشخ ہلکر۔
آرٹ کمپیٹیشن ئٹی ہندی شائراک لمئی بولی ئٹ، بلوچی شئیر نا زریعہ ئٹ بلوچستان نا دیہاڑ و دود ربیدہ نا روشنائی شاغار۔
آرٹ کمپیٹیشن نا مجلس ئٹی تران کرسا آرٹسٹ و ایلوفتا پاننگ اسک کہ دہنا سرگرمی تیان خوانندہ و ورنا تا آرٹ و ہنر اجاگر مریک۔ دہنا ایونٹ آ تیان خوانندہ و ورنا تا لائخی تے نمائش نا وارخواہی رسینگیک۔
او پاریر کہ بی ایس او پجار نا کنڈان آرٹ کمپیٹیشن اسہ گچینو گھام اسے، آرٹ کمپیٹیشن ٹی آوار مروکا مہمانک خوانندہ تا آرٹ ورک ئنا ستا ئے کریر۔
یاتی مرے کہ دا آرٹ کمپیٹیشن ئے ڈگری کالج کوہلو ٹی اڈ تروئی اسک ولے ڈگری کالج کوہلو نا پرنسپل و کالج انتظامیہ نا نیمہ غان آرٹ کمپیٹیشن نا موکل تننگ متو۔
بی ایس او پجار کوہلو زون نا صدر حیربیارمری نا رد ئٹ ہراتم او کالج نا پرنسپل و انتظامیہ آن ڈگری کالج کوہلو ٹی آرٹ کمپیٹیشن ئے اڈ تننگ نا موکل ہلنگ نا کوشت کریر گڑا ڈگری کالج نا پرنسپل نہ بیرہ اوفتے دڑکو تس بلکن بی ایس او پجار کوہلو زون نا صدر تون بد زبانی کرے و بی ایس او تون اوار خوانندہ تے کالج آن کشنگ نا دڑکو ہم تس۔
