جمال رئیسانی نا گلگت بلتستان نا دورہ آن پد السی دباؤ و ہندی ورنا تا سخت نغد کاری آن گڈ گلگت بلتستان اسمبلی نا باسک آک تدینی نا مذمت ئے کریر۔
بلوچستان نا وزیر جمال خان رئیسانی یوتھ کانفرنس ئٹی اوڑدئی کن گلگت بلتستان آ ہناسس۔ ہراڑے منَہ حکومتی و ہندی بندغ اسکول نا مسن تے اونا بخیر کن کسر تیا سلیفیر ہراڑان ہندی بندغ آک داڑا سخت خار ئنا درشانی کریر۔
اسمبلی نا باسک آتا پاننگ اس کہ جمال رئیسانی ماہ رنگ بلوچ نا خواست آتے پورو کننگ کپک اودے گلگت بلتستان آ خواہفنگک و ننا مسن تے اونا بخیر کن سلیفنگک۔ نن سرپند مرینہ کہ دا بندغ بلوچ آتا خونی ءِ، دننگا بندغ آتا بخیر کن ننا ایڑ تے و مسن تے قطار ئٹ سلیفنگ ننا بےشرفی ءِ و اسمبلی دا نا برخلاف کاروائی کے۔
اسمبلی نا باسک آک پاریر کہ منَہ بندغ گلگتی دود آتے نتا کیرغ آن کیرہ و خونی تا بخیر کن معصوم آ چُنا تے کاریم ئٹ ہتیرہ ہرا نا برخلاف دمدستی قانودی کاروائی نا حکم تننگ مرے نہ تو اسمبلی نا باسک آک دا نا برخلاف بائیکاٹ جرسا برانز نا پڑو کرور۔
