برانز کروکاک بلوچستان ئٹی زوراکی نا بیگواہی تا گواچی مروک بندغ آتا عکس و پلے کارڈ ہرفیسُر۔
بلوچ نیشنل موومنٹ نیدر لینڈ ہنکین نا کنڈ آن نیدرلینڈ ایمسٹرڈام اسکوائر ئٹی زوراکی ئٹ بیگواہی تا جہانی دے ئنا رد ئٹ برانز کننگا و ریلی ئس کشنگا۔ برانز ئٹی بلوچ نیشنل موومنٹ نا باسک آتا بھلو کچ ئس بشخ ہلک. برانز کروکاک بلوچستان ئٹی زوراکی نا بیگواہی تا گواچی مروک بندغ آتا عکس و پلے کارڈ ہرفیسُر ہرافتا بندغی حق آتا لتاڑ تا برخلاف نعرہ لکھوک اسّ۔
برانز کروک آتیان شاری ولید، علیاء بخشی بلوچ، اسلام مراد بلوچ، باسط ظہیر بلوچ، عبدالوحید، زہرا بلوچ، مہیم عبدالرحیم ، عبدالواحد و ڈاکٹر لطیف بلوچ ہیت کرسا پاریر کہ دا وخت آ بلوچستان ئٹی پاکستانی لشکر و ڈھکوک ادارہ آتا دو آن ہزار آ بندغ آک زوراکی ئٹ بیگواہ کننگانو ہرافتیٹی سیاسی باسک، خوانندہ، وکیل و لس شاریک اوار ءُ، ہندن ہزار آ جشوک جونک دو تمانو۔
او پاریر کہ بلوچستان ئٹی پاکستانی لشکر بیگواہی نا پاش و سافو سوب مونا ہتپک، و گیشتر بندغ آک واپس یلہ کننگ مفسہ، یا اوفتا جشوک آ جونک دو تمرہ ہرافتا بیدادی نا نشان مریک۔ پاکستانی فوج ئنا زوراکی بھلو وخت ئسے آن برجاء ءِ ہرا بندغی حق آتا اسہ بھلو ویل اسے۔ دا خطہ نا جہی آ بندغ آتے ریاستی زوراکی، کاریم و پورہیا نا ویل و بے انصافی تون مون تروئی تمک، ولے جہانی برادری دا کھل زوراکی تیا اسل ہِچ کُچِنگ اف۔
بلوچستان ئٹی لشکر کشی، وے قانودی کھسفنگ و لس شاری تیتو وے بندغیئو روشت تخنگ نا وڑ انگا عمل آک ہڑدے نا کاریم جوڑ مسنو، پاکستانی لشکر نا کنڈ آن بلوچستان ئٹی زوراکیک ہڑدے نا بنداو آ مننگو، جتا تنظیم آک ہر وار دا تدینی تا ذمہ وار آتے سزا تننگ نا خواست ہم کرینو ولے دائسکان ہچو گامگیج متنے۔
ایسر ئٹ او پاریر کی جہانی برادری و بندغی حق آتا تنظیم آک بلوچستان ئٹی زوراکی ئٹ بیگواہی و پاکستان نا زوراکی تا برخلاف توار ہرفِر و اوفتا پابندی خلنگ مرے۔
