خضدار آن بیگواہ کننگوک ممتاز بلوچ نا ایڑ ئنا مسڑ بانڑی بلوچ چاگڑدی حوالکاری میڈیا غا اسہ وڈیو کلہو ئس شنگ کرسا پارینے کہ کنا الہ ممتاز بلوچ ئے 6 ستمبر 2022 آ خضدار آن مُسٹمیکو وار زوراکی ئٹ بیگواہ کننگا و او ہنوکا اِرا سال آن دائسکان بیگواہ ءِ۔ داکان مُست ہم اِرا وار اودے زوراکی ئٹ بیگواہ کننگاسس و تشدد آن پد یلہ کننگاسس ولے مُسٹمیکو وار دزگیر کننگ آن پد اونا ہچو حوال اف۔
او پارے کہ کنا الہ ممتاز بلوچ نا زوراکی ئٹ بیگواہی ئے اِرا سال پورو مننگ آ 06 ستمبر آ بلوچ وائس فار جسٹس نا کنڈ آن کمپین ئس اڈ تننگ نا پڑو کننگانے۔ ای کُل زوراکی ئٹ بیگواہ مروکا بندغ آتا خاہوت و بندغی حق آتا باسک آتیان خواست کیوہ کہ اوفک دا رد ئٹ 2 منٹ ئنا ویڈیو پیغام ریکارڈ کیر۔
بانڑدی بلوچ نا پاننگ اس کہ داکان بیدس کُل سیاسی و چاگڑدی باسک، وکیل، خوانندہ و حوالکار آتون اوار زند ئنا ہر بشخ تون سیالی تخوکا بندغ آتیان خواست کیوہ کہ اوفک دا کمپین نا بشخ مرسا ممتاز بلوچ نا رکھوک آجوئی کن توار بُڑز کیر و ننا توار مریر۔ مہم نا وخت دا ہیش ٹیگ ئے کارمرز کیر۔ #ReleaseMumtazBaloch
