سردار اختر مینگل اینو تینا استعفی ئے سیکریٹری قومی اسمبلی تون جمع کرفے۔
او پارے کہ ای تینا باوہ سردار عطاء اللہ مینگل نا کذیت نا مسٹمیکو سال دے آ اودے دروت ندر کرسا پارلیمنٹ نا باسک مننگ آن استعفیٰ ایتوہ۔
اونا چاگڑدی حوالکاری تلہ ایکس آ ہم پوسٹ کرسا پارے کہ ای، اختر مینگل، قومی اسمبلی نا باسک، پارلیمنٹ نا باسک ئنا عہدے آن استعفی ایتوہ۔
سردار اختر مینگل نا پاننگ ءِ کہ بلوچستان نا ساڑی آ حالیت کنے دا گھام ئے ہرفنگ آ بیوس کرینے۔ ننا صوبہ چرجوئی ئٹ دا ایوان نا کنڈ آن نظرانداز مرسا بسنے۔ ہڑدے ننے دیوال ئٹ خلنگک، ہراڑان ننے تینا کڑد آ نظرثانی کننگ آن بیدس ہچو کسر بچتنے۔ دا اسمبلی ٹی بلوچستان نا الس ئنا گواچنی نمائندگی مفننگ نا سوب آن، کنا وڑ ئنا توارک ہچو معنی خیز بدلی ہتنگ کپسہ۔
اونا پاننگ ءِ کہ دا ہیت پاش مسنے کہ ننا برانز یا اظہار رائے ئے ساندہ مخالفت تون مون تروئی تمک۔ ننا بندغ آتے یا تو چُپ کرفنگ مریک یا غدار پاننگک، یا اوکان ہم گندہ، کھسفنگک۔ دا حالیت ئٹی، ای دا لائخی ٹی ودیک کاریم کننگ ئے منکن سرپند مفرہ، انتئے کہ داڑے کنا ساڑی مننگ کنا نمائندہ الس کن ہچ فائندہ مند رہینگتنے۔
اندا سوب آن ای خواست کیوہ کہ کنا استعفی ئے قبول کننگِہ۔ اللہ بلوچستان نا رکھ ئے کے و خوشحال کے۔
