بھاگ ئٹی زوراکا پھر تیان پد ناڑی جھل ئنا وہنگ بس کتّو۔ بھاگ شار و ہیب ءَ کھیب ئٹ لوڑو نا زور ءِ، درو بھاگ شار ئنا رکھ ئنا بند ئٹی دیر اِرا کھونڈ خَلکنے۔ ہراڑان دیر واپڈا گریڈ اسٹیشن ٹی پیہانے و بھاگ شار و ایلو علاقہ آتا بجلی ہِنوکے۔
ہندن اوستہ محمد ٹی زوراکا پھر تیان گنداخہ نا بھاز آ علاقہ آتیٹ لوڑو مسّنے و کھیرتھر کینال نا بھاز آ دُھر آتیٹ کھونڈ ملِنگ آن کیہی خلق آتہِ دیر ہلکنے۔ و بھلو کچ ئس ساری نا فصل آک دیر ئٹی ءُ۔
حوال آتا رِدئٹ اوستہ محمد ٹی دائسکان کمک نا کاریم تا بنا متنے۔ ہزار آ بندغاک اُراتہِ الِّسہ نالی تا کرّک آ رہینگ آ مجبور ءُ۔
داڑتون اوار نصیر آباد، بولان مولہ جھل و ایلو بُڑزنگا علاقہ آتیان بروکا دیرک بابا کوٹ و کوٹ پلیانی نصیر آباد ٹی بھلو نسخان کرینو۔
یونین کونسل کوٹ پلیانی نا وائس چیئرمین امیر حمزہ عمرانی نا گوٹھ تون اوار پین بھازا کِلی تہ دیر ہلکنے، ہرافتیٹ گوٹھ حاجی میر محمد بخش پلیانی، گوٹھ محمد علی عمرانی، گوٹھ نواب خان عمرانی، گوٹھ لیاقت عمرانی، گوٹھ علی حسن عمرانی، گوٹھ حاجی علی مدد عمرانی، گوٹھ حاجی صدام حسین عمرانی، گوٹھ میر اصغر علی عمرانی، گوٹھ محمد حسین عمرانی، گوٹھ حاجی سکندر علی عمرانی، گوٹھ محبوب علی عمرانی گوٹھ میر حسن عمرانی گوٹھ سرفراز عمرانی گوٹھ لعل جان عمرانی گوٹھ برکت علی عمرانی گوٹھ ٹکری عبدالکریم عمرانی گوٹھ محمد اسماعیل عمرانی گوٹھ امید علی عمرانی گوٹھ کونسلر عبدالستار عمرانی گوٹھ محمد ابراھیم عمرانی گوٹھ محمد دین عمرانی گوٹھ علی گل عمرانی گوٹھ خدابخش عمرانی گوٹھ مولا بخش پلیانی گوٹھ رانجھن خان عمرانی گوٹھ گلاب خان عمرانی گوٹھ ممتاز علی عمرانی گوٹھ ایاز علی عمرانی گوٹھ سیف اللہ بدھ گوٹھ میر محمد پندرانی گوٹھ جمعہ خان جتک گوٹھ محمد صلاح عمرانی گوٹھ علی نواز عمرانی گوٹھ رسول بخش پلیانی گوٹھ علی شیر عمرانی و ایلوفک اوار ءُ۔
شار ئے ملّفوکا کسرک ہم بند مسّنو ہراڑان مخلوق بھلو سختی سوری تا گْواچی ءِ۔ ضلعی انتظامیہ و حکومت آن کمکی کاریم نا خواست کننگانے کہ غُٹ آن مہالو کوٹ پلیانی نا کسر ئے جوڑ کننگہ تاکہ کسر نا ملِنگ آن مخلوق ئے کمک ئس رسینگہ۔
ایلو نیمہ آ مچھ ئنا بھلا جیل ئٹی عمر قید نا بندی ئس اُست ئنا دورہ آن ساہ تسّنے۔ حوال تا رِدئٹ عمر قید نا بندی داد محمد-عبدالستار قوم اچکزئی تعلقداری پشتون باغ شال اُست ئنا دورہ آن دنیا آن رخصت کرینے۔
یات مرے کہ داڑان اِرا تُو مہالو ہفت جون اِرا ہزار بیست و چھار ئٹی عمر قید نا جیلی شال ئنا ہندی عبدالظاہر-نذر محمد اچکزئی ہم دم تسّس ہرادے جیل انتظامیہ نا کُنڈ آن خودکشی نا پِن تننگاسس۔ مچھ جیل ئٹی بلوچستان نا غُٹ جیل آتیان زیات بندی تا خودکشی و اُست ئنا دورہ آن کھئنگ نا کچ رپورٹ مسنے۔ مُستی پٹ و پول پولیس کننگ ئٹی ءِ۔
