جنیوا ٹی مروکا مجلس بلوچستان برجاء غا حالیت بحث نا بنجاہ مرو۔
اقوام متحدہ نا ہیومن رائٹس کونسل نا جنیوا ٹی ستمبر- اکتوبر 2024 نا سیشن نا وختا بی این ایم بلوچستان ئٹی بندغی حق آتا بارث ئٹ مُسہ دے ئنا مجلس اڈ ترو۔ او وخت جتاء پروگرام نا زریعہ ئٹ بلوچستان ئٹی بندغی حق آتا حالیت و بلوچ راجی جیڑہ غا روشنائی شاغنگو۔
دا مجلس تا بناء 16 ستمبر آن مرو، ہمودے پریس کانفرنس کننگو۔ 17 ستمبر آ برانز مرو و 17 آن 18 ستمبر اِسکان عکس آتا نمائش مرو ہراٹی بلوچ و بلوچستان نا بابت ئٹ چاہنداری تننگو۔
بی این ایم نا چاگڑدی ادارہ ” زرمبش نیوز“ عکس نشان تننگ کن عکس کش آ تیان خواست کرینے کہ او دا نمائش ئٹی اوار مننگ کن تینا کشوکا عکس آتے زرمبش ئے ای میل، وٹس ایپ و ٹیلی گرام آ راہی کیر۔
دا مراگش تیٹ جہان نا جتاء ڈیہہ تیان بی این ایم نا باسک و قیادت اوار مرو۔ دا مجلس تے زرمبش نیوز تون اوار بی این ایم نا جتاء چاگڑدی اکاؤنٹ آ تیا لائیو تننگ مرو۔
بلوچ نیشنل موومنٹ نا جارکش پارے کہ پارٹی بلوچستان ٹی بندغی حق و بلوچ راجی آجوئی نا تحریک و سوج آتے ہلِسہ جہانی ادارہ تے پام ترو۔ بلوچستان اَسہ کوزہ مروکو ڈیہہ اسے، ہرادے پاکستان تینا لشکری تاغت نا زور آ کوزہ کرینے، بلوچ راج مزاحمت کننگ ءِ و دا مزاحمت ئے ایسر کننگ کن پاکستانی لشکر زوراکی ئٹ بیگواہی و بیدس قانود آن کوش نا وڑو ڈوہ تیٹ اوار ءِ۔ بلوچ سرمچار آتا جلہو تے توننگ ئٹی بے سوبی نا سوب آن پاکستانی لشکر تینا غصہ ئے اُلس آ کشِسہ اوفتے ٹک کیک۔
بلوچستان آ پاکستان مارچ 1948 آ کوزہ کرے و ہمو وخت آن بلوچ راج ئنا برخلاف لشکر کشی برجاء ءِ، دا دے تیٹ بڑزکو عسکری و سیاسی کالخواک بلوچستان ئٹی برجاء زنک کشی ٹی ترندی ہتنگ نا ہیت کننگ ءُ ہراٹی بروکا دے تیٹ پین دتر شولنگ نا گمان ءِ، ہرادے توننگ کن زو جہانی گھام ہرفنگ بکار ءِ۔
او پارے کہ بلوچ سرمچار آتا دو آن تینا باء تننگ و لشکری بے سوبی تے ڈھکنگ کن پاکستانی لشکر مُست آن زوراکی ئٹ بیگواہ کروک بندغ آتے دزگیری ٹی کھسفِسہ اوفتا جون تے بٹِک، ہراٹی ترندی ہتنگانے۔ دا ہمو حالیت ءِ کہ ہراڑا جنیوا نا مجسل ئٹی ہیت مرو۔
بی این ایم نا کنڈ آن بندغی حق و بلوچ راجی باسک آتے دا پروگرام آتیٹ اوار مننگ نا دعوت تننگک۔
چاگڑدی میڈیا غا دا ہیش ٹیگ آتون اوار دا مجلس آک تولان کننگور۔
#BalochistanCrisis
#BNMGenevaEventsSep2024
#FreedomJusticeEquality
جارکش کل پارٹی باسک و اوار مروکا تے پارے کہ چاگڑدی تلہ غا دا وختا حوالکاری آ پام تیر، و جتاء بولی تیٹ شنگ مروکا مواد آتے تروکا ہیش ٹیگ آ تیتون اوار زیات تالان کیر۔
