نوشکی آن زوراکی ئٹ بیگواہی نا گواچی مروکا آصف و رشید نا بیگواہی نا برخلاف کوئٹہ ٹی برانز کننگا۔
شش سال مُست نوشکی آن پاکستانی لشکر نا دو آن دزگیر مننگ آن پد بیگواہ مروکا خضدار نا ہندی اِرا کزن آصف و رشید بلوچ نا بیگواہی نا برخلاف کوئٹہ ٹی برانز و ریلی کشنگا۔
زوراکی ئٹ بیگواہ آ آصف و رشید نا خاہوت نا نیمہ آن مروکا برانز ئٹی سیاسی، چاگڑدی تنظیم آتا رہشونک بھلو کچ ئسیٹی اوار مسُر۔
برانزیک کوئٹہ پریس کلب آن ریلی ئس کشار ہرا جتا جتا کسر تے آ مرسا دوارہ کوئٹہ پریس کلب آ سر مس ہراڑے بندغ آک برانزی تیتون ہیت کریر۔
دا رد ئٹ آصف و رشید بلوچ نا ایڑ سائرہ بلوچ نا پاننگ اسک اینو 31 اگست نا دے کنا ایلم تا زوراکی ئٹ بیگواہی ٹی اسہ پین سال ئس ودا شش سال آن ہر جاگہ تینا ایلم تا بے گناہی نا ثبوت ترسا عدالت، کمیشن تیا ہنانٹ ولے ننے انصاف رسینگتو اسہ خاہوت ئسے ریاست شش سال آن اشتماعی ازیت تننگءِ۔
او پارے کہ دا ریاست آن سوج کننگ خواہیوہ کہ کنا ایلمک امرو میار ئس کرینو کہ اوفتے شش سال آن بے قانودی دزگیر کننگ آن پد ہم دائسکان اوفتا میار ثابت کننگ متنے کنا ایلم تا دزگیری ہم پاش کننگ متنے، شش سال گدرینگ آن پد ہم ننے پاننگ مننگ اف کہ اوفک ارا ازیت گاہ ٹی بندءُ۔
سائرہ نا پاننگ اسک کہ ہنوکا شش سال آن ریاست نا نیمہ آن جوڑ مروکا کمیٹی و عدالت آتا ہننگ اٹ ننے انصاف تننگ نا جاگہ عدالت و کمیشن تیٹی تولوک کارندہ آک ننے گیشتر تنگ کیرہ۔
او خواست کرے کہ اگہ کنا ایلم و کزن آ ریاست دوبہ خلیک گُڑا اوفتے عدالت تیٹی ہتے فری ٹرائل نا موقعہ ہیتے اگہ اوفتا جرم ئس ثابت مریک گُڑا اوفتے سزا ایتے اگہ نا اوفتے یلہ کے۔
