زوراکی ئٹ بیگواہ کننگوک شہزاد احمد کن اینو خاران ئٹ برانز کننگا۔ اونا خاہوت نا پاننگ اس کہ شہزاد احمد ئے پاکستانی لشکر زور ئٹ بیگواہ کرینے، اودے پھاش کرسہ یلہ کننگہ۔
حوال تا رِدئٹ خاران آن پاکستانی لشکر نا دُو آن زورئٹ بیگواہ کننگوک شہزاد احمد نا بیگواہی نا برخلاف اونا خاہوت نا نیمہ آن خاران شار ئٹی برانزی ریلی ئس کشنگا و مظاہرہ کننگا۔
مظاہرہ کروکا چیف چوک خاران آن ریلی ئے کشّار و کیہی کسر تیٹ چرّینگار، اوفتا دُو تیٹ برانز نا حوالہ ئٹ کارڈ اسّکہ۔ اوفتا پاننگ اس کہ ہندا تُو ئنا ہَودہ تاریخ آ پاکستانی لشکر محبوب ملازئی نا مار شہزاد احمد ئے دزگیر کرسا بیگواہ کرینے و داسکان اونا ڈس اف۔ شہزاد و ایلو بیگواہ مروکا بندغ آتے آجو کننگہ۔
برانز کروکا ضلعی حاکم و ادارہ آتیان خواست کریر کہ اگہ شہزاد احمد آ دوبہ ئس ارے تو اودے پھاش کرسہ عدالت آتا ہتنگہ۔ اِرا ہفتہ گدرینگانے اونا بارث ئٹ ہچو حوال ئس تننگ ئٹی افس اگہ شہزاد احمد یلہ متو خاہوت تون اوار گیشتر برانز کرون و اونا زمہ واری ریاست آ مرو۔
برانز ئٹی خاران و غُٹ بلوچستان نا ایلو علاقہ آتیان زورئ ٹ بیگواہ کننگوک بندغ آتا آجوئی کن نعرہ خلّنگا و آجوئی نا خواست کننگا۔
