بیگواہ آصف بلوچ و رشید بلوچ نا ایڑ سائرہ بلوچ چاگڑدی حوالکاری میڈیا غا وڈیو کلہو ئس شنگ کرسا پارینے کہ 31 اگست 2018 ٹی کنا ایلم آصف بلوچ و کنا الّہ مار رشید بلوچ ئے اوفتا ایلو سنگت آتتون اوار زنگی ناوڑ ہرا نوشکی نا پِنی ءُ سیل و سواد نا جاگہ اسے، ہموکان دزگیر کننگاسس۔ یک ستمبر آ اوفتا لٹ کُٹ کروکو عکس شِنگ کننگا، اوفتا دزگیری ئے ریاستی ادارہ آک پھاش کریر۔ ولے اوکان پد ہم ہنوکا شش سال آن نن تپّنہ کہ او اراڑے و انت حال ئٹی ءُ۔
او پارے کہ چُنک سنی ٹی تینا خْواننگ و گْوازی نا وخت ئٹی ای ہر گِڑا ئے الّاٹ تینا ایلم تا آجوئی کن بلوچستان تون اوار اسلام آباد ئٹی ہم کیہی ریلی و تولوک برانز آ تیٹ بشخ ہلکُٹ ولے ننے انصاف رسینگتو۔ اسلام آباد نا ہائی کورٹ مرے یا بلوچستان نا ہائی کورٹ، برانز، عدالت آک، کمیشن آک، جے آئی ٹی، ہراڑے ہم اومیت ئس اس نن تینا ایلم تا بےگناہی ئے پھاش کننگ کن ہنان ولے ننے ہِچ ورندی ملّتو۔
اونا پاننگ اس کہ دا شش سال ئٹی انصاف خْواہنگ نا ایوِز ئٹی کنے آ کیہی وار بغاوت و دہشتگردی نا مقدمہ کننگا۔ ننے خُلیفنگا، سرف گاڈیک ننا پدئٹ تمّار و کاغذ آتا موت لکھسہ ننے خُلیفنگ نا کوشست کننگا واہم ننے انصاف اسہ جاگہ سے آن رسینگتو۔ دا شش سال ئٹی بھوز آ خسّوکا جون تے ای خناٹ۔ بیگواہ غا بندغا تِہ دروغ ئنا مون تِس آتیٹ خلّنگک ہراڑان تینا ایلم تیکن ننا فریشانی ٹی ودکی مسنے۔
او ودیک پارے کہ ہراتم ہم بیگواہ غا بندغ آتے خلیرہ بِٹرہ تو نن اسپتال آتیٹ پھیری کینہ کہ اوفتیٹ ننا ایلمک تو افس۔ نن انصاف کن ہر وڑئٹ جہد کرینُن ولے اینو اسکان ننے انصاف تنّنگ ئٹی افس۔
او ایسر ئٹ پارے کہ سی و یک اگست آ کنا ایلم تا زور ئٹ بیگواہی ئے شش سال پورو مننگ ئٹی ءِ، نن شال پریس کلب نا مونا دے آن نا دو ءَ نیم آ اسہ برانزی ریلی ئس کشّون و ای شال ئٹی ساڑی غُٹ سرپند آ مخلوق آن خواست کیوہ کہ دا ریلی ٹی بشخ ہلیر۔ ہندن سی و یک اگست آ شام ئنا کنا ایلم تیکن چاگڑدی حولکاری میڈیا غا مہم ئس چلّفنگو اوٹی ہم بشخ ہلیرے۔
