حوال تا رد ئٹ بلوچستان نا جتا علاقہ آتیان شش جشوک جون خننگانے ہرافتیان چھار ئنا چاہنداری پاکستانی لشکر نا دو آن بیگواہ مروک ورنا تا رد ئٹ مسنے۔
چاہنداری مروک جون تا بارث ئٹ پاننگک کہ او خضدار و شال آن خننگانو، و ہر چھار خُضدار نا ہندی ءُ۔
جون تا چاہنداری سعید احمد غلامانی، نعیم الدین شیخ، نثار احمد زہری و فیاض جتک نا پن ئٹ مسنے۔
ہندی حوالکار تا رد ئٹ جون 2024 ٹی خضدار نا ہند بازگیر آن عبدلنبی غلامانی نا مار سعید غلامانی ئے پاکستانی لشکر دزگیر کننگ آن پد زوراکی ئٹ بیگواہ کریسس۔ ہراکان پد اونا بارث ئٹ ہچو معلومداریرسینگتویسس۔
ایلو کُنڈ آن ضلع خضدار نا ہندی نعیم الدین شیخ ئے ریاستی ادارہ آتا کارندہ آک مَنہ تُو مُست زوراکی ئٹ بیگواہ کریسُر۔
اندن نثار احمد زہری ئے ہم ریاستی ادارہ آتا کنڈ آن منَہ تُو مست زوراکی ئٹ بیگواہ کننگاسس و اینو اونا جون نعیم الدین و سعید احمد تون اوار خضدار نا علاقہ کھنڈ آن خننگانے۔
اندن ضلع خضدار نا ہندی و لیویز کارندہ فیاض جتک، کریم بخش نا مار ئنا جون شال آن خننگا اودے ہم پاکستانی لشکر دزگیری آن گڈ بیگواہ کریسس۔
رسینگوکا حوال تا رد ئٹ 13 جولائی نا دے خضدار مین آر سی ڈی کسر آن ریاستی ادارہ آتا کارندہ آک فیاض جتک ئے زوراکی ئٹ بیگواہی نا گواچی کریسُر۔ ہرانا جشوک جون درو شال آن خننگانے۔
ایلو جشوک جون تا دائسکان چاہنداری متنے ولے اندا خلیس نا درشانی مننگ ءِ کہ او ہم پاکستانی لشکر نا دو آن بیگواہ کننگوک بندغ ءُ ہرافتے دروغ ئنا مونتس ئٹ کھسفنگانے۔
یاتی مرے آپریشن ھیروف آن گڈ آئی ایس پی آر بی ایل اے نا بیست و یک بندغ خلنگ نا دعوی کریسس ولے بی ایل اے نا کنڈ آن شنگ مروک درشان ئٹ بیرہ دہ بندغ نا شہیدی نا پاننگاسس۔ ایلو بیگواہ غا بندغ آتے پاکستانی لشکر دروغ ئنا مونتس ئٹ کھسفِسہ بی ایل اے نا سرمچار ظاہر کننگ نا کوشست کننگ ءِ۔
