حوال تا رد ئٹ بارکھان ئٹی صحافی آن پد سیاسی باسک کوہلو کمانڈنٹ نا پاننگ آ زوراکی ئٹ بیگواہ کننگانے اندن تربت آن اسہ بندغ ئس بیگواہ کننگانے۔
بلوچستان نا ضلع بارکھان الائنس نا سینئر باسک آصف جان بلوچ ئے کوہلو کمانڈنٹ شام ئنا 12 بجہ آ زوراکی ئٹ دزگیری آن پد بیگواہ کرینے۔
خاہوت بندغی حق آتا ادارہ تیان خواست کرینے کہ آصف جان کن توار بُڑز کیر۔
داکان مُست بارکھان ئٹی کرنل نا پاننگ آ حیات جان کھیتران پنی ءُ حوالکار ئسے بیگواہ کننگ نا حوال مونا بسس۔
ایلو نیمہ غا دماغی حالیت آن نزور ءُ ورناس تربت آن پاکستانی لشکر نا دو آن زوراکی ئٹ بیگواہ کننگانے۔
تربت نا ہند ناصر آباد آن پاکستانی لشکر احمد بلوچ نا مار ندیم بیوس ئے دزگیر کننگ آن پد بیگواہ کرینے۔
پاننگک کہ ندیم بیوس نا سیالی بھاز مسکین ءُ اُرا سے آن ءِ و اود زہنی نزور ءُ بندغ اسے۔
