حوال تا رد ئٹ خاران آن پاکستانی لشکر اِرا حقی ءُ ایلم دزگیر کننگ آن گڈ بیگواہ کرینے۔
تومکا تے اینو 28 اگست آ وگہ نا پاکستانی لشکر خاران دل آرام چوک آن بیگواہ کرینے۔
بیگواہ کننگوک ایلم تا چاہنداری محمد غوث یلانزئی نا مار بختیار و کامران نا پن ئٹ مسنے۔
تدینی آن گڈ پن کروک بندغ آتا خاہوت ریڈ زون آ برانز بناء کرینے ہراڑے ڈھکوک ادارہ آتا دفتر آک ءُ۔ خاہوت نا خواست ءِ کہ تومکا ورنا تے یلہ کننگِہ۔
حوال تروکا تا پاننگ ءِ کہ یلانزئی قبیلہ نا منَہ ضمیر فروش تینا ذاتی مفاد کن ایف سی و ڈھکوک ادارہ تتون کاریم کیرہ و ذاتی جھیڑہ غا تا سوب آن کوزہ گیر ادارہ آتا دو آن بے ڈوہ آ ورنا تے دزگیر و بیگواہ کرفرہ۔
یاتی مرے بلوچستان ئٹ زوراکی نا بیگواہی تیٹ چرجوئی ئٹ ودکی مننگ ءِ۔ بیرہ اینو نا دے ئٹی دا ششمیکو بیگواہی نا تدینی ئے ہرا رپورٹ مننگ ءِ۔ داکان مُست بارکھان آن صحافی تون اوار تربت، کراچی و گوادر آن پنچ بندغ نا زوراکی ئٹ بیگواہی نا حوال مونا بسنے۔
