حوال تا رد ئٹ بلوچستان نا ضلع بارکھان آن تعلقداری تخوکا صحافی حیات خان کھیتران ئے پاکستانی لشکر نا اسہ کرنل ئسے نا پاننگ آ دزگیر کرسا بیگواہ کننگانے۔
صحافی نا خاہوت نا رد ئٹ حیات خان کھیتران ئے ایف سی کوہلو 86 ونگ ئنا کرنل بابر خلیل تینا ایلو کارندہ تتون اوار بے قانودی دزگیر کرسا بے ڈس ءُ جاگہ سے آ درینے ہراکان گڈ ننا حیات خان تون ہچ حال حوال مننگ اف۔
خاہوت نا پاننگ ءِ کہ ایف سی کرنل صحافی ئے بیگواہ کرینے و نن اونا بازیابی نا خواست کینہ۔
صحافی حیات خان کھیتران نا خاہوت پارینے کہ حکومت، بڑزکو کوالخوہ و صحافی برادری آن خواست کینہ کہ او حیات خان نا رکھوک یلہ مننگ کن کمک کیر اگہ حکومت دا ویل آ چُپ مس تو نن سخت برانز کرون۔
ایلو کنڈ آن بلوچستان نا ضلع کیچ آن پاکستانی لشکر اسہ بندغ ئسے دزگیر کننگ آن گڈ بیگواہ کرینے۔
بیگواہ مروکا بندغ نا چاہنداری عبدلواحد نا مار جاوید نا پن ئٹ مسنے ہرا تربت نا علاقہ گوکدان نا ہندی اسے۔
بیگواہ کننگوک بندغ نا لمّہ نا پاننگ ءِ کہ کنا مار، ہرا مزور اسے، تینا کاریم ئٹ سیٹلائٹ ٹاون آ ہناسس ہراکان اودے دزگیر کننگ آن گڈ بیگواہ کننگانے۔
اونا لمّہ نا پاننگ ءِ کہ کنا مار ئے یلہ کننگِہ اگہ اوڑا دوبہ ارے تو اودے عدالت ئٹ ہتیر، دا وڑ اودے بیگواہ کرسا ننے اذیت تفس۔
