حوال تا رد ئٹ بلوچستان نا ضلع کیچ ئنا ہند بلیدہ گردانگ آن 26 اگست آ شام ئنا 9 بجہ نا وختا سلاہ بند بندغ آک دکان ئسیٹی پیہِسہ اسہ بند ئس برمتہ کننگ آن گڈ کھسفینو۔
کہوکا بندغ نا چاہنداری علی مراد نا مار حکیم نا پن ئٹ مسنے ہرادے تھوفنک نا زور آ برمتہ کننگ آن پد اِرا کلو میٹر مُر دریسہ بیست منٹ آن پد گیشتک نا ہند آ کھسفنگانے۔
ہندی مخلوق نا پاننگ ءِ کہ حکیم بلوچ اَسہ خوانندہ و کاروباری ورنائس اسک۔ تدوکا دہ سال آن گردانک ئٹی دکانداری کریکہ و بھاز شریف و سادہ ءُ بندغ ئس اس، اونا ہچو پارٹی و تنظیم ئسے تون تعلقداری متنے۔
ہندی بندغ آک پاریر کہ ہرا سلاہ بند بندغ آک اودے برمتہ کننگ آن گڈ کھسفینو، او سرکاری مخ تفی ٹی کاریم کروک ڈیتھ سکواڈ نا بندغ آک مسنو۔
او پاریر کہ اِرا دے مُست شام ئنا وختا حکیم بلوچ تُربَت آن بلیدہ آ ہِننگ اسک و کسر ئٹ سلاہ بند بندغ آک اوڑا سم کاری کریر، سم کاری آن اونا جند ئے نسخان متو ولے اونا اُلاخ ئے نسخان رسینگا۔
ہندی حوالکار تا رد ئٹ سلاہ بند جلہوکار حسن بادشاہ پنی ءُ صوبہ دار ئسے ہرا نا تدوکا کیہی سال آن بلیدہ ٹی پوسٹ مسُنے۔
پاننگک کہ مَنہ دے آن صوبیدار بادشاہ ہفت موٹر سائیکل آتیا ساڑی اَسہ ٹولی ئسے تون بلیدہ کوچگ بزپیش گلی گردانک ئٹی گشت کننگ اس، ہندا ٹولی نا بندغ آک حلیہ و پُچ آتیان پیشن نا بروک لگارہ۔
