اقوام متحدہ پاکستان ئے اَسہ سخت او کال ئس شنگ کرسا حکومت آ زور تسُنے کہ او نسلی اقلیت خاص وڑ ئٹ بلوچستان ئٹی بندغی حق آتا برجاء خلیس تے مُر کننگ کن زوت گھام ہرفِہ۔
جمعہ نا دے جنیوا ٹی مروکا مجلس ئٹی نسلی فرخ ئنا ایسری نا بابت ئٹ اقوام متحدہ نا کمیٹی پاکستان نا حوالہ ئٹ تینا بھرم تے شنگ کرے، ہراٹی اسلام آباد ئے پاننگا کہ او نسلی و مذہبی سروک، سیاست دان، اُلس ئنا زوراکی ئٹ بیگواہی تا کُل رپورٹ آتا پٹ ءَ پول و اوفتا برخلاف قانودی کاروائی کن کُل المی گھام تے ہرفِہ۔
اقوام متحدہ نا پینل تا بھرم خاص وڑ ئٹ بلوچ راہشون، سیاست دان، اُلسی سروک و بندغی حق آتا رکھ کن بیگواہی تا مستقل مسئلی آ زور تسُر، کمیٹی پاکستان آ زور تسک کہ او کُل رپورٹ کروک کیس آتا پٹ ءَ پول ئے کے و اوفتا کیس تے عدالت ئٹ بنِہ، دا ہیت آتے یخینی کرسا زمہ وار آتیان حساب ہلے، اگہ کس آ ڈوہ ثابت مریک گُڑا جہانی قانود آتا رد ئٹ عدالت آ تیان سزا تننگ مرے۔
زوراکی نا بیگواہی تیان بیدس اقوام متحدہ نا پینل بلوچستان و اِیلو خطہ تیٹ نسلی اقلیت آتے مون تروک شابیتی چاگڑدی و اقتصاد نا چیلنج آ تیا پام تس، کمیٹی پاکستانی حکومت آن خواست کرے کہ او بلوچ خطہ ٹی نیستی و بے روزگاری ئے کم کننگ کن اہم او گھام ہرفِہ ہراٹی روزگار نا وارخواہی تے اسکان برانز رسائی یخینی مرے، تربیت تننگ، و چُنکا کاروبار تا ترقی کن کمک اوار ءُ۔
اقوام متحدہ پاکستانی حکومت آ زور تس کہ او بلوچستان آن رسینگوکا قدرتی وسائل تا استحصال آن دوئی مروکا آمدنی ئے بلوچستان ئٹی ہندی تیا دوراہ خلنگ نا ادارہ جاتی گھام ہرفِہ۔
کمیٹی وسائل کشوکا ڈٹ تیکن لائسنس تننگ آن مُست زیمی ہندی تا رضامندی دوئی کننگ کن صلہ نا اہمیت آ زور تس۔
اقوام متحدہ بنداوی ہاٹی ئے مونی دننگ و ساف دِیر، سفائی و بجلی نا وڑو بنداوی چاگڑدی خذمت اِسکان پام ترسا پارے ہمو ہند آ تیٹ رہینگ و رہینگینگ کن حاکیت آتے جوان کننگ نا سفارش کرینے۔
ایسر ئٹ، اقوام متحدہ نا پینل خاص وڑ ئٹ بلوچستان ٹی لشکری چوکی و قانود نافذ کروکا کارندہ تا کُنڈان توغت نا بے کچ کارمرز، بندغ آتے بیم ئنا گواچی کننگ و دڑکو تننگ آ فریشانی نا درشانی کرے،کمیٹی پاکستان آ زور تس کہ او کل غاو تا پٹ وپول ئے کے و دُہنا بد روشتی تے توننگ کن زہم تخوک گام ہرفِہ۔
