بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹ پارے کہ 19 اگست 2024 آ سرمچار شہید میجر انجینئر نصر اللہ عرف چاکر سراوان، مستونگ نا ہند آب گل نا ٹک آ دشمن لشکر تون جنگ ئٹی شہید مس۔ او دلیری و جیرت نا مثیل ئس جوڑ کرسا تینا کُل سنگت آتے سلامتی ئٹ کشِسہ شہیدی نا بڑز انگا ہند آ سر مس۔
او پارے کہ شہید انجینئر نصر اللہ عرف چاکر 2001 ئٹ واجہ مراد گجر مشکے نا ہندی نا اُراٹی ودی مس او اسہ سول انجینئر، بھاز لائخ، جفاکش، شعور تخوک، دلیر و مخلص ءُ بلوچ فرزند ئس اس، او بلوچستان آ پاکستان نا زور ئنا کوزہ و راجی محکومی نا برخلاف آزادی نا جہد ئٹی تینا کڑدارئے ادا کننگ کن دسمبر 2017 ٹی بلوچستان لبریشن فرنٹ نا صف تیٹی اوار مسس۔ اونا لائخی و راہشونی نا گشاد آتا سوب آن بی ایل ایف اودے سراوان ئٹی سروکی نا ذمہ واری ترسا میجر نا عہدئے تس۔ شہید تینا کُل ذمہ واری تے جوانی و سخت زیبائی ئٹ پورو کرسا سنگت آتون اسہ چنکو وخت ئسیٹی بلوچستان لبریشن فرنٹ ئے مچھ، بولان،مستونگ،کچھی و سیوی ٹی منظم کرے۔میجر نصر اللہ ہندا ہنداتیٹ بلوچ راجی آجوئی سنگر (براس) ئنا کارم تیٹی جوانو کڑدار ئس ادا کرینے۔ تینا مستقل مزاجی و دلیری نا سوب آن شہیدی اسکان کیمپ کمانڈر نا ذمہ واری تیا سلوک اس۔
ترجمان پارے کہ بلوچستان لبریشن فرنٹ شہید میجر نصر اللہ عرف چاکرئے بلوچ راجی تحریک آجوئی ٹی اونا مخلص انگا کڑدار و راجی خذمت آتیکن دروت ندر کیک و دا قول ئے دوارہ کیک کہ بلوچستان نا آجوئی اسکان شہید میجر نصر اللہ و ایلو شہید آتا مشن ئے برجاء تخنگ مرو۔
