بلوچستاب نا جتا ضلع آتیٹ مروکا تدینی تیٹ اِرا دے ئٹی شش بندغ بیران مسنو ہرافتیٹی اسہ چُناس ہم اوار ءِ۔
حوال تا رد ئٹ قلعہ عبداللہ گلستان بازار نا خڑک آ سم کاری آن اسہ بندغ ئس بیران مسنے ہرا نا چاہنداری محمود آغا نا مار حق نواز نا پن ئٹ مسنے۔
سم کاری آن گڈ لیویز ہند آ سر مرسا جون ئے المی کاروائی آن پد وارث آتا حوالہ کرینے و ڈوہدار تا دزگیری کن علاقہ ئے بند کرینے۔ پاننگک کہ تدینی متکنو دشمنی ئسے نا سوب آن مسنے۔
اندن پنجگور نا علاقہ تسپ سریقلات ئٹی نادرست آ موٹر سائیکل سوار بندغ آک سم کاری کرسا تسپ ئنا ہندی بہران نا مار احمد ئے کھسفینو۔
بیران مروک بندغ نا جون ئے ٹیچنگ ہسپتال آ رادہ کننگانے ولے تدینی نا سوب دائسکان سما تمتنے، پولیس ودیک کارروائی کننگ ءِ۔
داکان بیدس شال نیو سریاب نا ہند آ اُرا ئسے آن اسہ جون خننگانے ہرا نا لخ تھڑوک مسنے۔ پولیس نا رد ئٹ جون ئے اسپتال آ رادہ کننگانے۔ ہراڑے اونا چاہنداری جمعہ خان ولد حاجی بادشاہ نا پن ئٹ مسنے ہرا ملک سیف ٹاﺅن آ رہینگاکہ۔
نادرست آ بندغ آک پن کروک بندغ نا لخ ئے تھڑسا اودے کھسفینو، جون ئے المی کاروائی آن گڈ خاہوت نا حوالہ کننگانے و کیس سیریس کرائم انوسٹی گیشن ونگ ئے تننگانے۔
اندن وڈھ ئٹی باران جھل ئٹی ٹُبِسہ اسہ بندغ ئس بیران مسنے، ہرا نا چاہنداری محمد زمان نا مار وقار احمد نا پن ئٹ مسنے و پاننگک کہ اونا تعلقداری شال آن ءِ۔
ایلو کنڈ آن جھل مگسی نا علاقہ بستی کمال شاہ ئٹی 4 سالی عیان علی اُراغان پیشن نوکاپ نا دیر ئٹ ٹُبسہ کھسکنے، خاہوت نا بندغ آک و ہندی مخلوق جون ئے کشِسہ اسپتال آ رادہ کریر۔
بستی کمال شاہ دریائے مولہ غان بروکا ہار ئنا دیر آن زیمی مسس، 10 دے گدرینگ آن پد ہم انتظامیہ ہار ئنا دیر ئے کشتوسس۔
اندن دکی ٹی ہندی کولا کانڑ ئٹی تدینی ئس مسنے و اسہ بندغ ئس بیران مسنے۔ ہرا نا چاہنداری عبدلکریم نا مار سید محمد نا پن ئٹ مسنے ہرا اوڑے مزوری کریکہ۔ اودے دمدستی اسپتال آ رادہ کننگاسس ولے او الو ساہ تسس۔
پن کروک بندغ نا تعلقداری اوغانستان آن پاننگک، ریسکیو کروکا تا رد ئٹ جون ئے المی کاروائی آن گڈ اوغانستان آ رادہ کننگانے۔
