بلوچستان نا ضلع خاران ٹی اَسہ تعمیراتی کمپنی ئسے نا سائٹ آ نا دُرست آ سلاہ بند بندغ آک جلہو کریر۔
شابیتی حوال تا رد ئٹ اینو ویگ ئنا یک بجہ نا وختا خاران نا ہند سرگردان ئٹی سی پیک کسر آ سلاہ بند بندغ آک تعمیراتی کمپنی نا سائٹ آ جلہو کرسا اوڑے ساڑی کبین آ مشینری، ڈوزرز، لوڑرز، ڈمپر، ٹرک آ تون اوار ایلو مڈی تے ہُشسہ تباہ کریر۔
تُدینی آن پد پولیس و لشکر نا ٹولیک جاگہ آ سرمسُر، جلہوکار آک پیشتمنگ ٹی سرسوب مسُر۔
یاتی مرے کہ درو ضلع کیچ ئنا ہند بلیدہ ٹی ہم سلاہ بند بندغ آک اَسہ تعمیراتی کمپنی نا سائٹ آ جلہو کرِسا اوڑے ساڑی کُل مشینری، لوڈر، ڈمپر لاری و اِیلو مڈی تے ہُشار۔
تعمیراتی ڈٹ و اوفتا کاریم کروکا کمپنی تیا داکان مُست ہم جلہو مسُنے، ہرافتا زمہ واری تے بلوچ آزادی خواہوک سلاہ بند تنظیم آک ہرفینو، اینو نا جلہو نا زمہ واری ئے دائسکان ہچو تنظیم ئس ہرفتنے۔
آجوئی خواہوک تنظیم آتا پاننگ ءِ کہ وسائل نا لُٹ و پل ئٹی ہندا کمپنی تا بھاز دُو ارے، انتئے کہ او وسائل تا لُٹ وپل کن کسر جوڑ کیرہ ہرانا سوب آن کوزہ گیر ئے وسائل دننگ ئٹی مَچہ وخت و وسائل زیات دننگ ئٹی کُمک رسینگیک۔
