تدوکا پِھر تیان خراب مروکا کسرک داسکان ملنگتنو، وے جان آ نیاڑی چھانڑدہ گھنٹہ بند آ کسر آ دڑد کُنسہ ساہ تس۔
حوال تا رد ئٹ دمب اللہ بخش چنال گوٹھ جھاؤ آواران نا جہی آ نیاڑی ئے خیرئٹ مننگ کن کراچی آ دننگ ئٹی کسر تا بندی نا سوَب آن ہُرے مس، نیاڑی اسپتال ئے سرمننگ کتو ہرا نا سوب آن کسر آ دڑد کُنسہ بیران مس۔
خاہوت نا پاننگ ءِ کہ وے جان آ نیاڑی ئے زمباد گاڈی سیٹی کراچی آ دننگا، ولے پِھر تیان کسر تا بندی و جھاؤ تحصیل ہیڈ کوارٹر اسپتال ئٹی نیاڑی تا چُنا خننگ نا آسراتی تا وے افی نا سوَب آن نیاڑی نن ئنا دو بجہ غا جھاؤ گوکو چیک پوسٹ نا سند آ چھانڑدہ گھنٹہ گھٹ مس و دڑد آتا سوب آن ساہ تس، ولدا خاہوت نیاڑی نا جون ئے جھاؤ آ راہی کرے۔
یات مرے کہ بلوچستان ئٹی گیشتر خیرئٹ مننگ آ نیاڑی تا کھئنگ نا حوال رسینگک۔ ہراڑے علاقہ آتیٹ جانجوڑی و دارو نا نیستی تا سوَب آن مخلوق شار تا بریک ولے خراب انگا کسر و مُرغنا سفر تا سوَب آن اوفتے وخت آ علاج رسینگپک و جانجوڑی نا آسراتی مفننگ نا سوب آن نیاڑیک کہیرہ۔
پوسکنو حوال ئسے نا رِدئٹ علاقہ ٹی جانجوڑی نا آسراتی تا وے افی آن ہنوکا یک و نیم سال ئٹی بلوچستان ئٹی بیرہ پسنی ٹی خیرئٹ مننگ آ بیست و سئے نیاڑی دنیا ئے الانو۔
ایلو کُنڈ آن ڈیرہ بگٹی و کوہ سلیمان ئٹی ہم خراب انگا کسر و اسپتال آتیٹ بےآسراتی نا سوَب آن خیرئٹ مننگ آ کیہی نیاڑیک چُنا تون اوار دم ایترہ۔ جہی آ مخلوق نا خواست آتیان پد ہم اوفتے آسراتی رسینگ ئٹی اف۔
