زوراکی ئٹ بیگواہ کننگوک ظہیر احمد نا خاہوت کوئٹہ ٹی صحافی تے بریفنگ ترسا پارے کہ ہڑدیئی بنداو آ دا پریس کلب ئٹی زوراکی نا بیگواہی تیان زیمی مروکا خاہوت آک نُما ذریعت ئٹ تینا دڑد و ڈکھ ئے جہان اسکان سر کننگ نا کوشست کیرہ کہ نوا کیہی سال تیان زوراکی ئٹ بیگواہ اوفتا بندغ آک دوارہ اُرا تیا سر مریر۔ نن ہم ہمو زیمی آ خاہوت آتیان اسٹ اُن۔
او پاریر کہ ظہیر احمد ولد ڈاکٹر حاجی عبداللہ اسہ سرکاری ملازم اسے و تدوکا 15 سال آن پاکستان پوسٹ آفس ئٹی کلرک نا ڈیوٹی کننگ ءِ۔ او 27 جون آ پنچ شمبے نا دے 2 بجہ نا وختا تینا دفتر ئٹی جی پی او کوئٹہ ٹی زرغون روڈ آن کلی بنگلزئی سریاب روڈ آ بننگ اس تو اودے اُراغا سر مننگ آن مُست بیگواہ کننگا۔
ظہیر احمد نا خاہوت نا پاننگ اس کہ ظہیر احمد اسہ سرکاری ملازم اوے و اونا ہچو سیاسی بیک گراؤنڈ ئس اف بیرہ خاہوتی و دتر نا سیالی تا سوب آن ظہیر احمد تون اوار ایلو سیال آتے ہر وخت بیم ئنا گواچی کننگک و اُرا تیا نن ئنا تہاری ٹی کیہی وار چھاپہ خلنگانے۔
خاہوت نا پاننگ ئس کہ ظہیر احمد بلوچ ئے پاکستانی لشکر سی ٹی ڈی و ڈھکوک ادارہ آتا کارندہ غاک کوئٹہ آن زوراکی ئٹ بیگواہ کرینو دا رد ئٹ نن پریس کانفرنس ئٹی اونا آجوئی نا خواست ہم کرین و ظہیر احمد نا آجو مفننگ نا دروشم ئٹ نن بیوس مرسا برانز نا کسر ئے ہرفین۔
او پاریر کہ ظہیر احمد نا آجوئی کن نن کوئٹہ ٹی چھانڑدہ دے اسکان تولوک برانز تون اوار دپ درشانی کرین و دا نیامٹ پولیس نا کنڈ آن پرایمن برانزی تیا تاغت کاریم ئٹ ہتنگ مس، بیست ئنا کچ برانزی تے دزگیر کننگا ہرافتیٹ پنچ زالبول ہم اوار اس، پدان 14 جولائی آ ریڈ زون ئٹی حکومت تون ہیت و تران ئٹی برانزی تا آجو مننگ، سی ٹی ڈی آ ایف آئی آر کننگ و پانزدہ دے ئٹی ظہیر احمد ئے یلہ کننگ نا گپ آتیا امنائی مس۔
اوفتا پاننگ ئس کہ حکومتی کمیٹی نا باسک آتا باور ترفنگ آن پد نن پانزدہ دے کن تینا برانز ئے پد بٹین ولے اسہ تُو ئس گدرینگ آن گڈ ہم کوالخواہ تا کنڈ آن ہچو گامگیج متنے و دا وخت ئٹی حکومتی کمیٹی بیرہ گھوجالینگ ئٹ کاریم ہلکنے۔
ظہیر احمد نا خاہوت نا ودیک پاننگ اس کہ دا پریس کانفرنس ئٹ نن پاش پانہ کہ کوالخواہ تا کنڈ آن ودیک اسہ ہفتہ نا تہٹی ظہیر احمد بلوچ ئے آجو کننگ متو تو نن سخت برانز نا کسر ئے ہرفون ہراٹی تولوک برونز آتتون اوار دپ درشانی اوار مرو۔
ایسر ئٹ اوفتا پاننگ اس کہ نن بلوچستان ئٹی سیاسی و چاگڑدی تنظیم آتون اوار جہانی بندغی حق آتا تنظیم آتیان خواست کینہ کہ او ظہیر احمد نا آجوئی کن تینا کڑد ئے ادا کیر۔
