یک و نیم سال ئٹی گوادر نا تحصیل پسنی ٹی چُنا خننگ نا وختا زالبول تا بیرانی تیٹ ودکی مسنے، رپورٹ نا رد ئٹ یک و نیم سال ئٹی 23 زالبول چُنا خننگ نا وختا بیران مسنو و کپر نا ہندی زالبول ئس تدوکا تو ئٹی چُنا خننگ نا وختا بیران مسنے۔
دننگا گیشتر تدینیک پسنی نا دیہات آتیٹ رپورٹ مسنو۔
اسہ رپورٹ ئسے نا رد ئٹ بلوچستان نا دریابی شار پسنی ٹی تدوکا یک و نیم سال ئٹی 23 زالبول چُنا خننگ نا وختا بیران مسنو۔
رپورٹ نا رد ئٹ پوسکن ودی مروکا چناک ہم بیران مروکا تیٹ اوار ءُ، دا کیس آک جنوری 2023 آن ہلیس اینخو جولائی 2024 اسکان رپورٹ مسنو، گیشتر کیس آک پسنی نا دیہات آتیٹ جانجوڑی نا آسراتی مفننگ و ڈاکٹر آتا نیستی نا سوب آن مریرہ۔
محکمہ جانجوڑی نا اسہ ڈاکٹر ئس یو این اے ئے پارینے کہ بلوچستان نا دیہات آتیٹ نیاڑیک دائسکان ہم مُست ئنا وڑ دائی تیان چُنا خنفرہ ہرا نا سوب آن او مرگ ئنا گواچی مریرہ۔
او پاریر کہ تحصیل پسنی ٹی یک و نیم سال ئٹی 23 زالبول نا کہنک چنکو ہیت ئس اف۔
او پارے کہ خواست دا ہیت ئنا ءِ کہ ننے خاص وڑ ئٹ دیہات آتیٹ رہینگوکا بندغ آتیٹ چاہنداری تروئی تمو تاکہ نت کبینی نا وختا او تینا نیاڑی تے الم اسپتال آ دیر تاکہ پوسکنا میڈیکل نا آسراتی و خاص وڑ ئٹ الٹراساؤنڈ ئٹ چُنا نا پوزیشن ئے معلوم کننگ مرے انتئے کہ چُنا خننگ نا وختا منَہ کیس اندنو مریرہ ہرا دودی آ وڑ و ڈول حل کننگ مفسہ۔
