پاکستانی سیکورٹی لشکر کائونٹر ٹیررزم ڈیپارٹمنٹ (سی ڈی ٹی ) نا دو آن زوراکی ئٹ بیگواہ کننگوک اسہ ورناس سخت نگیگ حالیت ئٹ آجوئی آن پد اسپتال ئٹ علاج نا وختا بیران مس۔
ورنا نا چاہنداری افضل خان نا مار عزیز احمد نا پن ئٹ مسنے ہرا اسپتال ئٹی علاج نا وختا ساہ تس۔
اونا خاہوت نا پاننگ ءِ کہ اسہ سال ئس مُست سی ٹی ڈی اودے دزگیر کرسا بیگواہ کریسس و پدان اودے پاش کرسا عدالت آ ہتنگاسس و عدالت اودے بےڈوہ پارِسہ آجو کریسس۔
ولے سی ٹی ڈی اودے دوارہ بیگواہ کرے و 15 دے مُست عزیز احمد ئے خیات آباد ٹول پلازہ نا رہا ٹپی حالیت ئٹ خسنگاسس، ہراکان گڈ او اسپتال ئٹ ساہ تس۔
ایلو کنڈ آن بلوچستان نا ضلع کیچ ئنا تحصیل بلیدہ نا علاقہ گلی و میناز آن برجاء تُو ئنا اولیکو ہفتہ ٹی پاکستانی لشکر نا دو آن دزگیری آن پد بیگواہ مروک چھار بندغ سئے شمبے نا شام آجو مرسا تینا اُراغا سر مسر۔
میناز بلیدہ نا جہی امید نا مار ماہد و گلی نا جہی حمید نا مار ولید، امید نا مار حنیف و امید نا مار نذیر نا آجوئی ئے اوفتا خاہوت پک کرینے۔
خیال ئٹ مرے کہ بلوچستان ئٹی زوراکی نا بیگواہی تا گواچی مروکا منَہ بندغ آک یلہ مریرہ تو ہموڑے بلوچستان نا جتا علاقہ آتیٹ پین بندغ زوراکی ئٹ بیگواہ کننگک۔ کیہی آجو مروکا بندغ آک زہنی ناجوڑی تا گواچی مریرہ و کیہیک جسمانی ناجوڑی و بےدادی تا سوب آن آجو مننگ آن پد بیران مریرہ۔
