زوراکی ئٹ بیگواہی مروکا عبد الحئی نا آجو مفننگ نا برخلاف کوئٹہ ٹی اونا خاہوت نا کنڈ آن ریلی و برانز اڈ تننگا۔
ڈاکٹر عبد الحئی بلوچ نا خاہوت نا کنڈ آن سئے شمبے نا دے بلوچستان یونیورسٹی آن اسہ ریلی ئس کشنگ مس ہرا جتاء کسر تیان مرسا کوئٹہ پریس کلب آ سر مس ہرڑے خاہوت تینا برانز ئے ریکارڈ کرِفے۔
ہموخت آ بیگواہ مروکا ڈاکٹر عبد الحئی نا خاہوت تون اوار ایلو بیگواہ مروکا بندغ آ تا خاہوت آ تیتون آوار بھلو کچ ئسیٹی شاریک اوار اسُر و بیگواہ مروکا بندغ آ تا عکس ہرفِسہ زوراکی ئٹ بیگواہی نا برخلاف نعرہ خلکُر۔
دا وختا ریلی ٹی اوار برانزی تیتون تران کرسا آواران نا ہندی زوراکی ئٹ بیگواہ مروکا ڈاکٹر عبدالحئی نا ایڑ بختاور بلوچ پارے کہ کنا ایلم ڈاکٹر عبدالحئی بلوچ ئے یک جون 2024 آ ریاستی لشکر دزگیر کرسا زوراکی ئٹ بیگواہ کرے، مُسہ تُو گدرینگ آن پد ہم اونا ہچ ڈس اف۔
بختاور بلوچ پارے کہ کنا ایلم سرکاری ملازم اسے و او آواران ڈسٹرکٹ ہسپتال ئٹی او پی آپریٹنگ اسسٹنٹ نا وڑ کاریم کیک، و اودے کلینک آن پاکستانی لشکری کارندہ آک زوراکی ئٹ بیگواہ کریر اگہ اوڑا دوبہ ارے گُڑا اودے عدالت ئٹی ہتیر یا کنا ایلم ئے پاش کرسا ننے پین اذیت آن آجو کیر۔
برانزی ریلی ٹی اوار بلوچستان آن زوراکی ئٹ بیگواہی نا گواچی مروکا بندغ آتا خاہوت آک خواست کریر کہ حکومت و سرکاری کالخواک ننا بندغ آتے پاش کیر۔
او ودیک پاریر کہ حکومت نا کنڈ آن ننے ننا بندغ آ تا آجوئی نا بدلہ آ پیسہ نا پیشکش اصل ئٹ خاہوت آتا ٹپ آ تیا بے خلنگ نا بریبر ءِ۔ کیہی سال تیان تینا بندغ آتا آجوئی کن جہد کننگ اُن اگہ حکومت گِڑاس تننگ کیک گُڑا ننے انصاف تے۔
