شال ئٹ زوراکی نا بیگواہی تا برخلاف برجاء برانزی کیمپ ئے 5551 دے مس، وکیل کہول کیمپ آ برسا اواری نا درشانی کرے۔
برانزی کیمپ ئٹ اوغانستان آن زوراکی ئٹ بیگواہ کننگوک شال ئنا ہندی محمود لانگو نا لمّہ، زائیفہ و چُناک اوار مسر۔
بیگواہ محمود لانگو نا خاہوت نا پاننگ اس کہ اودے 18 جون 2024 آ بیگواہ کننگانے ہرا وخت او تینا کاریم ئسیٹ اوغانستان نا علاقہ نمروز آ ہناسس۔ ہراڑے او بیگواہ کننگانے۔
او پاریر کہ نن اودے پٹنگ نا بھاز کوشست کرین ولے اونا ہچ ڈس اف۔ نن تھانہ غا تیا ہنان، ہر جاگہ غا پٹان ولے او خننگتو۔او پاریر کہ ننے خلیس ءِ کہ اودے پاکستانی ڈھکوک ادارہ آتا کارندہ آک سفر نا وختا بیگواہ کرینو۔
محمود نا خاہوت بندغی بنداو آ اونا آجوئی نا خواست کرے و پارے کہ او اگہ ڈوہ ئس کرینے تو اندا ڈیہہ ئنا جوڑ کروکا عدالت آتیٹ ہتنگ مرے و سزا تننگ مرے ولے اودے دا وڑ بیگواہ کننگ تینٹ اسہ ڈوہ اسے۔
ایلو کنڈ آن دا وختا وی بی ایم پی نا وائس چیئرمین ماما قدیر بلوچ جتا ڈَل تتون تران کرسا پارے کہ پاکستانی کوزہ گیر و اونا ڈھکوک ادارہ آک، ہرا بلوچ پارلیمنٹ پرست آتا کمک ئٹ بلوچ تحریک ئے سبوتاژ کننگ نا ہر وڑ ئٹ کوشست کننگ ءُ، بلوچ ورنا تے زوراکی ئٹ بیگواہ کرسا دزگیری ٹی اوفتے شہید کرسا اوفتا جون تی ویران آتیٹ خسرہ تاکہ ورنا تا اُست ئٹ خلیس ودی مرے و او تینا مزل اسکان سر مننگ آن مُست تحریک آن دو کشیر۔
او پارے کہ ولے داسا ُدن مروف، دا اوفتا ردی ئے کہ او دا سوچرہ کہ ورناک کس ئنا مونا سلاہ بٹور و سیاسی جہد کار آک شہید آتا دتر تون غداری کرسا تحریک آن بے تعلق مرور۔ بلوچ تحریک نا سپاہیک ہر چم بازی ئے بےسوب کرور ہرا 77 سال آن کاٹم آ کفن تفوک اوفتتون مون تننگ ءُ۔ او سرزمین نا دوست و عاشق آکو ہرا بلوچ شہید آتا عظیم قربانی تا سوب آن داسا بلوچ نا ہر چُنا بش مسنے و ہر اُراٹی تحریک نا ہیت آک مریرہ۔
او پاریر کہ داسا دشمن اگہ اسہ دے ئٹی ہزار جون ہم خسِہ ولے بلوچ داسا پدی مروف بلکہ شہید آتا قربانی تا سوب آن اوفتا حوصلہ آک پین بُڑز مرور اوفتا خار پین زیات مرو و دا نفرت آک اسہ دے بارود نا وڑ ترخور و اگہ دشمن ننا اسہ سیاسی جہد کار ئسے شہید کرے تو اونا بدل ئٹی ہزار آ ورناک دشمن کن مرگ جوڑ مرسا بش مرور و شہید آتا کاروان ئے مُستی درور۔ اگہ او اسہ بلوچ ورناس شہید کرے تو پین ورنا بش مرو و دشمن نا مقابلہ ئے کرور ولے دا تحریک ئے کس توننگ کروف۔
اونا پاننگ اس کہ اینو اگہ نن بلوچستان نا حالیت آتا جاچ ہلین تو نن بلوچ راج ئنا سرسوبی ئے خنون۔ اگہ تینا حق کن جنگ کننگ دہشت گردی ءِ تو ننے دا ہم منظور ءِ نن تینا قومی بقا کن ایسری دم اسکان جنگ کرون چائے کس ننے دہشت گرد پائے یا کس ئنا ایجنٹ، ننے قبول ءِ۔ داسا بلوچ چم بازی و پروپیگنڈہ نا گواچی مرسا جہد آن اسل دو کشوف۔
